Бүгүн, ахсынньы 17 күнүгэр,үгэс быһыытынан, РФ Бэрэсидьиэнэ Владимир Путин пресс-кэмпириэнсийэтэ буола турар.
Пресс-кэмпириэнсийэ туһунан ырытыһыы РБК ханаалга ыытыллар. Онно Саха сирин өрөспүүбүлүкэтин Ил Дархана Айсен Николаев быһа биэриигэ тахсан пресс-кэмпириэнсийэ тула уонна пандемия кэмигэр өрөспүүбүлүкэ балаһыанньатын билиһиннэрдэ. Ол курдук, Айсен Сергеевич пандемия кэмигэр дойду бэрэсидьиэнэ эрэгийиэннэргэ эппиэтинэһи сүктэрбитэ ордугун бэлиэтээтэ. Саха сиригэр коронавирус дьаҥын иккис долгуна этэҥҥэ ааһан эрэрин иһитиннэрдэ. Дьаҥнааччылар баар да буоллахтарына, ыараханнык ыалдьар дьон ахсаана аччаабытын эттэ. Экологическэй кыһалҕалары, ол курдук ойуур баһаардарын кыһалҕаларын ааспыт сайын көрүстүбүт диэн иһитиннэрдэ. Эрэгийиэн ураты килиимэтэ, усулуобуйата этэҥҥэ быһаарыллан иһэллэрин эттэ.
Ульяна Захарова, edersaas.ru