СӨ Ил Дархана Айсен Николаев бүгүн, от ыйын 18 күнүгэр, ойуур баһаарын умулларыыга ыксаллаах быһыы-майгы өрөспүүбүлүкэтээҕи хамыыһыйатын уочараттаах мунньаҕын тэрийдэ.
Саха сиригэр ойуур баһаарын балаһыанньата уустук. Билиҥҥи туругунан өрөспүүбүлүкэҕэ 223 ойуур баһаара бэлиэтэнэр. Бүтэһик сууккаҕа 22 ойуур баһаара эбиллибит, бу сир иэнэ 4,5 тыһыынча гектарга тэҥнэһэр. Бүтэһик сууккаҕа 12 ойуур баһаара, 90 тыһыынча кэриҥэ гектар иэннээх сир умуруоруллубут. Дьокуускайга тыаллаах күн туран, Горнай улууһугар буола турар ойуур баһаарын буруота куораты уонна ол тула нэһилиэнньэлээх пууннары буруонан тунуйда. Билигин өрөспүүбүлүкэтээҕи ЫБМХ хонтуруолугар Горнай улууһун Маҕарас, Дьиикимдэ, Кэптин уонна Мииринэй оройуонун Сүлдьүкээр, Сунтаар улууһун Кэмпэндээйи нэһилиэктэрэ бааллар. Ойуур баһаарын бэһис кылаастаах уустук балаһыанньата билигин Нам, Уус Алдан, Томпо, Өймөкөөн улуустарыгар буола тураллар. Төрдүс кылаастаах уустук балаһыанньалаах Өлүөхүмэ, Ленскэй, Сунтаар, Эдьигээн оройуоннара буолаллар. Бу күннэргэ Мииринэйгэ, Кэбээйигэ, Ленскэйгэ ардах түһэрэ күүтүллэр. Бүлүү бөлөх улуустарга эмиэ ардыан сөп. Күн-дьыл туругунан тыаллаах күннэр хоту, хотугулуу-арҕаа хайысхаларга туруохтара. От ыйын 21 күнүгэр Горнай улууһугар циклон дьайыытынан тыал илин диэки хайысхаланыаҕа. Ил Дархан Айсен Николаев Дьокуускайга буруо хойдубутунан ойуур баһаарын балаһыанньата намтыар диэри куорат уулуссаларын уунан күннэтэ ыстарарга сорудахтаата. Ону сэргэ аҕам саастаахтар, олохсуйбут ыарыылаахтар буруоттан сылтаан ыарыылара бэргиир түгэнигэр, суһал көмө үлэһиттэрин биригээдэлэрэ суһаллык көмөҕө кэлэллэрин туһугар доруобуйа харыстабылын министиэристибэтин дьаһайда.
«Төһө да бүтэһик нэдиэлэҕэ эрэгийиэҥҥэ ойуур баһаарын ахсаанын аччатыы буолбутун иһин, билигин да холкутуурбут эрдэ. Бары күүһү ойуур баһаарын утары үлэҕэ ууруохха, ойуур баһаарын ахсаана элбиэ суохтаах, РФ ЫБММ, оборуона министиэристибэтин көмөлөрүнэн күүс, кыах баар. Волонтердар хамсааһыннара кыттыста. Кинилэри өйүөххэ наада. Маны таһынан олохтоох нэһилиэнньэ, миэстэтигэр үлэлиир суһал ыстааптар көмөлөрүнэн ойуур баһаарын умулларыыга үлэ барар»-диэтэ Ил Дархан Айсен Николаев.
Ульяна Захарова, edersaas.ru
Андрей Сорокин хаартыскаҕа түһэриитэ.