Ил Дархан Айсен Николаев «Азия оҕолоро» оонньууларга кыттар хамаанданы кытта көрүстэ
Ил Дархан Айсен Николаев Владивостокка ыытыллар «Азия оҕолоро» VII Норуоттар икки ардыларынааҕы спортивнай оонньууларга кыттар Саха сирин сүүмэрдэммит хамаандатын кытта көрүстэ. Улахан таһымнаах күрэхтэһии буолара аҕыйах хонук хаалла. Өрөспүүбүлүкэ аатыттан 120 спортсмен уонна 50 тириэньэр кыттыаҕа. Оҕолор успуорт 18 көрүҥэр илин-кэлин түсүһүөхтэрэ.
«Саха сиригэр 1996 сыллаахха «Азия оҕолоро» норуоттар икки ардыларынааҕы спортивнай оонньуулар бастакытын ыытыллыбыттарынан киэн туттабыт. Бу тэрээһин аан дойду уонча дойдутун эдэр спортсменнарыгар үрдүк чыпчаалы дабайалларыгар үктэл буолбута саарбаҕа суох. Оччолорго күрэхтэспит оҕолортон билигин Олимпиада, аан дойду чөмпүйэнээттэрин кыайыылаахтара, призердара таҕыстылар», — диэтэ Айсен Николаев. Маны этэн туран, Айсен Сергеевич Пекиннээҕи Олимпиада боруонса призерун Георгий Балакшины, СӨ Успуорка уонна физическэй култуураҕа миниистирин, икки Олимпиада кыттыылааҕын Леонид Спиридоновы, дуобакка аан дойду 12 төгүллээх чөмпүйүөнүн, СӨ сүүмэрдэммит хамаандатын ыстаарсай тириэньэрин Гаврил Колесовы уо.д.а. ааттаталаата.
«Эһиги успуорка ситиһиилэргитин, дьаныаргытын, талан ылбыккытыгар бэриниигитин сөхтүм. Эһиги өрөспүүбүлүкэҕитин улахан арыанаҕа аатырдар улахан эппиэтинэстээххит. Владивостоктан 2024 сыллаахха Саха сиригэр ыытыллар оонньуулар эстафетатын илдьэ кэлиэххит», — диэн Ил Дархан бэлиэтээн эттэ.
Кыайыыны уонна ситиһиилэри баҕаран туран, өрөспүүбүлүкэ баһылыга сүүмэрдэммит хамаанда хапытааныгар, Арассыыйа үөрэнээччилэрин спартакиадатын боруонса призеругар, көҥүл тустууга Уһук Илиҥҥи федеральнай уокурукка бастыыр иһин күрэхтэһии кыайыылааҕар Анатолий Ивановка спортивнай экипировканы туттарда. Анатолий харда тылыгар Саха сириттэн кыттар хас биирдии спортсмен кыайыы иһин дьулуһуоҕун эттэ.
«Азия оҕолоро» оонньуу Владивостокка от ыйын 27 күнүттэн саҕаланыаҕа.