Ил Дархан Айсен Николаев авиация көмөтүнэн ойуур баһаардарын умуруоруу туһунан
СӨ Ил Дархана Айсен Николаев атырдьах ыйын 3 күнүгэр Мииринэй оройуонугар командировкаҕа бара сылдьан, ойуур баһаардарын умуруорууга тоҕо гражданскай авиация туһаныллыбатын быһаарда.
«Итиннэ элбэх ыйытыы киирэр. Бастатан, 150 миэтэрэҕэ диэри үрдүктэн уу кутуллуута оҥоһуллуохтаах. Ону көннөрү сөмөлүөт толорор кыаҕа суох. Иккиһинэн, буруоттан мэһэйдэтэн көстүү мөлтөөн турар кэмигэр, көтөр ааллары да, экипаһы да кутталга киллэрэр табыллыбат», — диэтэ кини.
Үөһээнэн барар ойуур баһаардарын умуруорууга РФ МЧС сөмөлүөттэрэ ( Бе-200 икки сөмөлүөт, уу кутар тэриллээх Ми-8 үс бөртөлүөт), РФ Оборонаҕа министиэристибэтин алта көтөр аала ( ИЛ-76 икки сөмөлүөтэ, уу кутар тэриллээх Ми-8 түөрт бөртөлүөт) көдьүүстээхтик туһаныллалларын Николаев бэлиэтээтэ. Ол гынан баран, бу күннэргэ улахан буруоттан ити салгын ааллара кыайан көтөр кыахтара суох.
ИЛ-76 хонук устатыгар 4 тахсыан сөп, 42 туонна ууну таһаарар кыахтаах, ууну кутуута 5-7 сөкүүндэ. Бе-200 сөмөлүөт-амфибия 12 сөкүүндэ иһигэр бааҕар 12 туонна ууну ылар. Күнтэн-дьылтан көрөн салгын ааллара көтөргө бэлэм тураллар.
Санатан эттэххэ, Ил Дархан Айсен Николаев Мииринэйгэ ойуур баһаардарын умуруорууга үлэлэһэр авиационнай этэрээттэр командирдарын, экипаж чилиэннэрин кытары көрсүбүтэ. Киниэхэ буруо намыраан сир-уот көстөр буолла да, сөмөлүөттэр өрөспүүбүлүкэ оройуоннарыгар ойуур баһаардарын умуруорууга көтөргө бэлэм туралларын иһитиннэрбиттэрэ.
Андрей Сорокин (СИА) хаартыскаҕа түһэриитэ.
+1
+1
+1
+1
+1
+1
+1