Бүгүн, кулун тутар 28 күнүгэр, Ил Дархан Айсен Николаев «Якутия24» телеханаалга ый түмүктэрин таһаарар биэриигэ кыттан, маасканан, аһынан-үөлүнэн хааччыллыы боппуруостарыгар тохтоото.
edersaas.ru
“Бу күннэргэ мин сорудахпынан бырабыыталыстыба бэрэссэдээтэлин солбуйааччы Денис Белозеров кууһунан атыылыыр улахан тэрилтэлэри кытары сүбэ мунньах ыыппыта. Биир сылга тиийэр ас-үөл саппааһа баар. Арай харыстанар маасканан уонна антисептигынан хааччыллыы боппуруоһа ыарахаттардаах. Дьиҥэр, бу Арассыыйа үрдүнэн маннык балаһыанньа үөскээтэ. Аан дойдуга да оннук. Антисептигы кыра-кыралаан аҕалаллар эрээри, тута атыыга барар. Арассыыйаҕа күннэтэ 1,5 мөлүйүөн эрэ маасканы оҥороллор. Бу олох аҕыйах. Холобур, Саха сиригэр күннэтэ 300-400 тыһыынча мааска наада», — диэн Айсен Сергеевич иһитиннэрдэ.
Бу күннэргэ Кытай Хэйлунцзян провинциятыттан 5 мөлүйүөн маасканы сакаастаабыттар. Онтулара кэлэр нэдиэлэ бүтүүтэ аҕалыллыахтаахтарын кэпсээтэ. Санатан эттэххэ, тохсунньу-олунньу ыйдарга сахалар Хэйлунцзяҥҥа мааска ыыппыттара.
edersaas.ru