Айылҕа харыстабыла Бэлиитикэ Сүрүн

Ил Дархан Айсен Николаев РФ Бэрэсидьиэнэ Владимир Путин сүбэ мунньаҕар кыттыыны ылла

Атырдьах ыйын 6 күнүгэр РФ Бэрэсидьиэнэ Владимир Путин дойдубут сиригэр-уотугар ыксаллаах быһыыны-майгыны суох оҥоруу туһунан куйаар ситиминэн ыыппыт видеокэмпириэнсийэтигэр Саха сирин Ил Дархана Айсен Николаев кытынна.

edersaas.ru

Мунньахха Айсен Николаев өрөспүүбүлүкэҕэ айылҕа баһаардарынан үөскээбит балаһыанньаны уонна уоту утары охсуһуу хайдах тэриллибитин туһунан кэпсээтэ. Кини тыаны туһаныы эйгэтигэр айылҕа баһаардарын утары көрүллэр субвенциялары түҥэтии нуорматын саҥаттан көрөргө ыҥырда. Бу боппуруоска тырааныспар өттүнэн уустук сырыылаах, суоллаах-иистээх эрэгийиэннэри сайдыылаах суоллаах эрэгийиэннэри кытта биир тэҥник сыаналаабакка, баһаары умуруоруу үлэтин дьиҥнээх сыанатыгар олоҕуран субвенциялары аныырга ыҥырда.

Айсен Николаев РФ Экологиятын миниистирэ Александр Козлов Саха сиригэр «Авиалесоохрана» филиалын улаатыннарар туһунан этиитин өйөөтө. Бу кыһалҕаны быһаарыы чэрчитинэн тэрилтэ үлэһиттэрин ахсаанын элбэтии уонна материальнай-тэхиньиичэскэй баазаны тупсарыы былааннанар. Ил Дархан Уһук Илин баар филиаллары барыларын күүһүрдүү оруннаах буолуоҕун бэлиэтээтэ. Оччотугар ханнык эрэ эрэгийиэҥҥэ ыксаллаах быһыы-майгы үөскүүр түгэнигэр, боппуруоһу суһаллык быһаарарга табыгастаах буолуоҕун эттэ.

Бу күннэргэ «Якутск» аэропорт көтөр-түһэр балаһаларын тутар, таҥар үлэлэр түмүктэннилэр. Саха сирин баһылыга Арассыыйатааҕы ЫБММ уонна байыаннайдар сөмөлүөттэрин көһөрүүнү төһө кыалларынан түргэтэтэр туһуттан, Владимир Путинтан сертификцияны ыытар уорганнар Росавиация уонна Ростехнадзор бэрэбиэркэни суһаллык ыыталларыгар сорудахтыырга көрдөстө.

Айсен Сергеевич мунньахха өссө биир кыһалҕаны таарыйда. Дьиҥэр, сокуон быһыытынан баһаары умуруоруу үлэтигэр дьон күҥҥэ 8 чаастан ордук үлэлиэ суохтаахтар. Ол эрээри ыксаллаах, уустук балаһыанньа үөскээбитин өйдөөн баһаары утары үлэлиир сулууспалар бэйэлэрин баҕаларынан 12-14 чааска тиийэ үлэлии сылдьаллар. Онон сибээстээн Айсен Николаев ойуур уотун умуруорууга үлэ чааһын таһынан (сверхурочнай) үлэлээччилэргэ төлөбүр сөптөөхтүк оҥоһулларын туһунан боппуруоһу көтөхтө.

«Саха сирэ» хаһыат, edersaas.ru

Хаартыска sakha.gov.ru

2
0