Ил Дархан Айсен Николаев: «Алтынньы 15 күнүгэр диэри тутуу үлэтэ түмүктэниэхтээх»

Ааптар: 
Бөлөххө киир:

Ил Дархан Айсен Николаев бүгүн Горнай улууһун Бэс Күөлүгэр ойуур баһаарын кэнниттэн чөлүгэр түһэрии үлэтэ хайдах-туох бара турарын билистэ.

Ил Дархан Айсен Николаев бастаан утаа Бэс Күөлүгэр уопсастыбаннай норуодунай фронт хайысхатынан 19 эрэгийиэнтэн 96 киһи көмөҕө кэлэн үлэлии сылдьарын көрсөн кэпсэттэ. Бастатан туран, Саха сирин олохтоохторун ааттарыттан бу ыксаллаах кэмҥэ кэлэн көмөлөспүттэригэр махтанна.

Ойуур баһаарыттан былдьаммыт 34 дьиэ оннугар саҥалары тутуу үлэтэ күөстүү оргуйар. Баһаар имири сотон ааспытын кэнниттэн барыта саргы-сатаҕай, дьиэлэр оһохторо эрэ харааран турар эбит буоллахтарына, билигин атын хартыына. Уот сиэн ааспыт кырсын уонна бөҕү-сыыһы барытын ньылбы ыраастаабыттар, үрдүнэн кумах, буор кутан тэҥнээн биэрбиттэр. «Туймаада-строй» ХЭУо хайыы-үйэ 10 дьиэ тимир сыбаайатын түһэрэн, үлэни ыраатыннарбыт. Биир дьиэ холлоҕоһун бүтэрэн, аллараанан тымныы үргүйбэтигэр аналлаах хара муостатын оҥоро сылдьаллар. 100 ынах сүөһү турар
саҥа хотонун тутуу саҕаламмыт, акылаатын оҥорон бүтэрбиттэр.

Ил Дархан Айсен Николаев: «Дьиэлэри тутуу кыраапык быһыытынан баран иһэр. 34 саҥа дьиэни 10 бэдэрээччит тутар. Билиҥҥи туругунан бу дьиэлэр сыбаайалара түһэн бэлэм. 18 дьиэ кэмпилиэгэ оҥоһуллубут. 10 дьиэ тутулла турар. Онон алтынньы 15 күнүгэр диэри тутуу үлэтэ түмүктэниэхтээх», — диэн эттэ.

Александр Тарасов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0