Ил Дархан Айсен Николаев Саха Өрөспүүбүлүкэтин судаарыстыбаннаһын күнүнэн эҕэрдэлиир
Ытыктабыллаах Саха сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан эһигини Саха Өрөспүүбүлүкэтин судаарыстыбаннаһын күнүнэн эҕэрдэлиибин!
Быйыл биһиги Саха сирин судаарыстыбаннай суверенитетын туһунан Декларация ылыллыбыта 30 сылын бэлиэтиибит. Бу – биһиги Арассыыйа федеративнай судаарыстыбатын быстыбат сорҕото буоларбыт бигэ бэлиэтэ. Бу – өрөспүүбүлүкэ олохтоохторун, хотугу кыраайы кытары олохторун холбообут бар дьону барытын сомоҕолуур үөрүүлээх күн. Биһиги баайбыт, биһиги киэн туттуубут – үгүс көлүөнэ сыралаах үлэтин түмүгэ!
Саха Өрөспүүбүлүкэтэ бүгүн – элбэх омуктаах Россия судаарыстыбатын биир эрчимнээхтик сайдар субъега. Саха сирэ Уһук Илиҥҥи регионнар ортолоругар социальнай-экономическай сайдыытын тэтиминэн бастыҥнар ахсааннарыгар сылдьар.
Коронавирус дьаҥа турбутунан төһө да ыарахаттар үөскээбиттэрин иһин, өрөспүүбүлүкэбитигэр Арассыыйа уонна аан дойду таһымнаах бөдөҥ индустриальнай бырайыактар үлэлэрэ ыытыллар, экономика тумус салааларыгар олох хаачыстыбатын тупсарарга, дьон этэҥҥэ буолуутун хааччыйарга туһуламмыт көҕүлээһиннэр олоххо киирэллэр. Гааһы уонна ньиэби хостуур үлэ Саха сиринээҕи киинин тэрийии салгыы ыытыллар, бу соторутааҕыта биһиги Арассыыйаҕа чоҕу хостуур бөдөҥ шахта бастакы уочаратын – “Инаглинскайы” уонна “Инаглинскай-2” хайа-байытар фабриканы, Хабаровскай кыраайга “Колмар” хампаанньа туппут “ВаниноТрансУголь” чох бөдөҥ терминалын бастакы уочаратын үлэҕэ киллэрии туоһуларынан буоллубут. Маннык киэҥ хабааннаах бырайыактары олоххо киллэрии өрөспүүбүлүкэ Бүтүн Арассыыйаны өрө таһаарыыга, кыаҕын бөҕөргөтүүгэ сүҥкэн кылаата буолар.
Куораттарга уонна оройуоннарга оҕо саадтарын, оскуолалары, култуура уонна успуорт объектарын тутуу салгыы тэтимнээхтик барар. Өрөспүүбүлүкэ киин куоратыгар судаарыстыбаннай-чааһынай бииргэ үлэ бастакы түһүмэҕэ түмүктэннэ. Ол үлэ чэрчитинэн 12 социальнай объект: 4 оскуола, 5 оҕо саада, Оҕо искусствотын оскуолата, Уһук Илиҥҥэ бастакы Smart-библиотека уонна Ю.А. Гагарин аатынан Култуура уонна аныгы искусство киинэ сүрдээх кылгас болдьох иһигэр тутуллан үлэҕэ киирдилэр, онон киин куорат үүнэр көлүөнэтин иитии, куорат олохтоохторун култуурунай олоҕун усулуобуйата эбии тубуста.
Федеральнай бырабыыталыстыба өйөбүлүнэн Дьокуускайга доруобуйа харыстабылын бөдөҥ объектарын – Онкологическай уонна Кардиологическай диспансердары тутуу салҕанар. Өрөспүүбүлүкэ оройуоннарыгар олорор дьиэлэри, социальнай объектары тутуу, массыына суолларын өрөмүөннээһин уонна уларытан тутуу тэтимэ түспэт.
Инники өттүгэр биһигини саҥа бырайыактар, умнуллубат кэрэ түгэннэр, кыайыылар уонна үрдүк ситиһиилэр күүтэллэр. Эһиги хас биирдиигит дьон олоҕун хаачыстыбатын төрдүттэн тупсарарга, өрөспүүбүлүкэ социальнай-экэнэмиичэскэй сайдыытынан инники күөҥҥэ тахсарыгар бэйэтин үлэтинэн сүҥкэн кылааты киллэрэр. Сомоҕолоһуу, күүстээх санаа уонна дьулуурдаах буолуу төрөөбүт Сахабыт сирэ уонна дойдубут бүттүүн чэчирии сайдарын туһугар хорсун соруктары быһааран, бары ыарахаттары туоруурбутугар бигэ тирэх буолуоҕа диэн эрэнэбин!
Бырааһынньыгынан, биир дойдулаахтарым! Эһиэхэ уонна чугас дьоҥҥутугар саҥа ситиһиилэри, дьолу, эйэни, этэҥҥэ буолууну уонна бары үтүөнү баҕарабын!
Саха Өрөспүүбүлүкэтин Ил Дархана Айсен Николаев