Өрөспүүблүкэ баһылыга Айсен Николаев Мииринэй оройуонугар тиийэ сылдьан, олохтоох актыбыыстарга улуус хас сэлиэнньэтин ахсын социальнай эйгэни уонна экэниэмикэ өттүнэн сайыннарыы туһунан этиилэри, идеялары хомуйан бэлэмнииллэригэр көрдөспүтэ. Бу курдук олохтоохтор, сир баайын хостооччулар уонна өрөспүүбүлүкэ салалтатын икки ардыгар оруннаах кэпсэтиигэ бачыым бэриллибитэ.
Балаҕан ыйын 9 күнүгэр Ил Дархан Айсен Николаев уонна АЛРОСА генеральнай дириэктэрэ Сергей Иванов Айхал бөһүөлэк олохтоох нэһилиэнньэтин кытта көрсөн кэпсэттилэр.
Айсен Николаев Мииринэй улууһа өрөспүүбүлүкэ, Уһук Илиҥҥи эрэгийиэн уонна дойду сайдыытыгар улахан оруоллааҕын эттэ. “Ол эрээри, улуус сайдыытыгар өрөспүүбүлүкэ, муниципальнай былаастар, “АЛРОСА” хампаанньа эрэ кыһаналлара тиийбэт – олохтоох дьон улуус сайдыытыгар көхтөөхтүк кытталлара сүдү суолталаах” диэн тоһоҕолоото Ил Дархан.
Айсен Сергеевич норуот актыыбын бэрэстэбиитэллэригэр улууһу сайыннарыы туһунан дьон этиитин хомуйар үлэни оҥорбуттарыгар махтанна.
АЛРОСА хампаанньа генеральнай дириэктэрэ Сергей Иванов Айхал бөһүөлэк тэрилтэ үлэтигэр төһүү буоларын эттэ. Кини этэринэн, 2021 сыл хампаанньа үлэтин бары хайысхаларыгар үтүө көрдөрүүлэри аҕалара күүтүллэр, ол хампаанньа социальнай хайысхаҕа ылыммыт эбэһээтилистибэлэрин толорууга үчүгэй сабыдыаллаах буоларыгар эрэннэрдэ.
Көрсүһүү кэмигэр Айхал бөһүөлэгин уопсастыбыннаһа элбэх улахан суолталаах кыһалҕалары ырытыыга таһаарда. Ол курдук, хаарбах дьиэттэн көһөрүү, суол-иис өрөмүөнэ, саҥа социальнай эбийиэктэри тутуу, үөрэҕирии, доруобуйа харыстабылын салааларын сайыннарыы уо.д.а. тыҥааһыннаах кыһалҕалар ырытылыннылар.
Хаартыска: sakha.gov.ru