Бэлиитикэ Сүрүн

Ил Дархан Абыйга сырыытыттан

Алтынньы 13 күнүгэр Ил Дархан Айсен Николаев Абый улууһугар үлэлээтэ. Белай Гора бөһүөлэгэр “Якутопторг” атыы-эргиэн логистическай киинигэр сырытта. Манна ас-үөл сыаната чэпчэки, ыраах сытар 12 нэһилиэнньэлээх пууҥҥа тиэрдэллэр.

Бу маннык таһаҕаһы, аһы-үөлү тиэрдэр киини Арктика улуустарыгар тутар соругу Айсен Николаев былырыын Анал этиитигэр туруорбута. Онон Абый улууһугар маннык логистическай киин аһыллыыта олохтоохторго үөрүүлээх түгэн. Холобур, сыаналара маннык: хортуоска киилэтэ – 74 солкуобай, луук – 75 солкуобай, арбуз уонна дыня – 140 солкуобай. Атын маҕаһыыннарга бу бородуукталар сыаналара 2,5 төгүл ыарахан. Тоҕо диэтэр, сөмөлүөтүнэн тиэрдиллэр.

Оттон манна харайыллар усулуобуйата тупсан, кыһыҥҥы суол аһыллыар диэри уу суолунан элбэх бородууктаны аҕалан кэбиһиэххэ сөп, оччоҕо тиэрдиллэр сыаната эмиэ чэпчиир. Онтон олох суола-ииһэ суох, ыраах дэриэбиэнэлэргэ уонна Аллайыаха, Муома нэһилиэнньэлээх пууннарыгар табаары бу киинтэн кыра сөмөлүөтүнэн таһыахтара.

Якутопторг” генеральнай дириэктэрэ Николай Алексеев саҥа дьиэтин-уотун көрдөрдө. Сылаас ыскылаакка 80 туонна, хортуосканы харайар сиргэ 190 туонна, халадыынньыкка 30 туонна батыан сөп. Бу дьиэҕэ атыылыыр саала баар.

Айсен Николаев 2024 сылга атыы-эргиэн логистическай кииннэрэ Арктика бары улуустарыгар тутуллуохтаахтар диэн соругу туруорда. Кэлэр нэдиэлэҕэ маннык киин Уус-Куйгаҕа, кэлэр сылга Дьааҥы Баатаҕайыгар уонна Орто Халымаҕа аһыллыахтаахтар.

Айсен Николаев салгыы Кэбэргэнэ бөһүөлэгэр сырытта, саҥа тутуллар эбийиэктэри  көрдө. Хочуолунай уонна спортивнай саала тутулла тураллар. Саҥа тутуллубут быраастаах амбулатория дьиэтин аһыллыытыгар кубалар кэлэн көтөн ааспыттара сөҕүмэр кэрэ көстүү буолла. Бу үтүө бэлиэ! Манна бэкээринэҕэ сылдьан «саҥа буспут килиэп сытыттан оҕо сааспар төннөн ыллым» диэн кини «Инстаграмыгар» суруйда.

— Хоту дойду олохтоохторун, дьаһалта үлэһиттэрин туруорсууларын бырабыыталыстыба сиһилии үөрэтиэҕэ. Арктика түргэнник сайдарыгар кыах үөскээтэ. Бастатан туран, дьон олоҕун таһыма, дохуоттара үрдүөхтээх. Абый улууһун сайдыытын туһунан мунньахха ити туһунан кэпсэттибит, — диэн кини этэр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0