Ил Дархан: «Анаалыс түмүгэ 3-4 күнүнэн биллиэхтээх»

27.10.2020
Бөлөххө киир:

Бүгүн, алтынньы 27 күнүгэр, Айсен Николаев коронавируһу бохсууга өрөспүүбүлүкэ суһал ыстаабын уочараттаах мунньаҕын ыытта. Мунньахха анаалыс түмүгүн күүттэриини түргэтэтии, кириип уонна ОРВИ утары быһыыны ылыы уонна куорат киин оптуобустарын тула кэпсэттилэр.

Дьокуускайга коронавирус анаалыһын түмүгүн күүттэрии кыһалҕата ортотунан быһаарыллыбыт эбит буоллаҕына, сорох оройуоннарга бу боппуруос билигин даҕаны сытыытык турар. Онон, Ил Дархан бээтинсэҕэ диэри бу кыһалҕаны быһаарар туһунан соруйда.

«Анаалыс түмүгэ 3-4 күнүнэн биллиэхтээх. Дьон нэдиэлэни быһа анаалыс түмүгүн күүтэбит диэн суруйар. Кинилэр бу кэм иһигэр эмтэммэттэрин ааһан, атын дьону ыарыыга сыһыараллар. Маннык табыллыбат», — диэн Айсен Сергеевич эттэ.

Итиэннэ Ил Дархан Дьокуускай оптуобустарыгар элбэх киһи мустубатын туһуттан, сырыылар икки ардыларын аччатар туһунан эттэ. Онуоха киин куорат баһылыга Сардаана Авксентьева ордук элбэх дьон айанныыр хайысхалаах 2-с, 3-с, 8-с, 35-с №-дээх оптуобустар таһааччыларыгар биллэриэх, соругу тутуспатах таһааччылары уларытыах буолла.

Өрөспүүбүлүкэ вице-премьера Ольга Балабкина бэлиэтииринэн, бүтэһик кэмҥэ ыарахан туруктаах ыарыһах элбээбит. Маннык туруктаахтары эмтиир өрөспүүбүлүкэтээҕи клиническэй балыыһаҕа үксүн амбулаторнайдык эмтэнэр дьон киирэр эбит. Бу түбэлтэҕэ коронавирус 1-кы, 2-с истиэпэнинэн дьаҥнаабыт амбулаторнайдык эмтэнэр дьону балыыһаҕа түргэнник киллэрии көмөлөһүөн сөп диэн Ольга Валерьевна эттэ.

Саха сирин сүрүн санитарнай бырааһа Маргарита Игнатьева 86,5% улахан, үксүгэр үлэлиир кыахтаах дьон ыалдьыбытын эттэ.  Ыалдьыбыт дьон 13,5 %-на оҕолор буолаллар. Саастаах дьон ыарыыга сутуллуута элбээбит. Быраас этэринэн, кириип уонна ОРВИ утары вакцинаны Саха сирин нэһилиэнньэтин 44,5 %-на ылбыт. Вакцина иккис баартыйата сэтинньи саҕаланыыта кэлэрэ күүтүллэр.

Ил Дархан уонна Бырабыыталыстыба пресс-сулууспата.

+1
0
+1
0
+1
0
+1
0
+1
0
+1
0
+1
0