Ил Дархан Айсен Николаев салалталаах Саха сиригэр коронавирус даҥа тарҕаныытын хонтуруоллуур суһал ыстаап бүгүн, алтынньы 23 күнүгэр, уочараттаах мунньаҕын ыытта.
Ил Дархан бэлиэтээбитинэн, РФ бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Нерюнгрига кэлэ сылдьан өрөспүүбүлүкэҕэ дьаҥы бохсуу туһунан мунньах ыыппыт. Манна нэһилиэнньэҕэ анаалыс түмүгүн түргэнник тиксэрии туһунан боппуруос көтөҕүллүбүт. Бу быһаарылларын туһуттан ИФА уонна ИХА ньыманан ылыллар тест ахсаанын элбэтэри былааннанар.
Вице-премьер, суһал ыстаап салайааччытын солбуйааччы Ольга Балабкина ааспыт сууккаҕа өрөспүүбүлүкэҕэ 179 киһи коронавируска сутуллубутун, онтон 110 киһи Дьокуускайга ыалдьыбытын туһунан иһитиннэрдэ.
Саха сиринээҕи Роспотребнадзор управлениетын салайааччы Маргарита Игнатьева өрөспүүбүлүкэҕэ бу нэдиэлэҕэ күннэтэ 5-6 тыһыынча коронавируска анаалыс оҥоһуллубутун эттэ. Маны сэргэ кини киин куоракка уонна оройуоннарга ыытыллар хонтуруоллуур-кэтиир үлэ салҕанарын туһунан бэлиэтээтэ.
Ааспыт күннэргэ Дьокуускайга 170 эбийиэк бэрэбиэркэлэннэ. Уопсастыбаннай сирдэргэ кэһии тахсар түбэлэтэтэ аччаабытын Дьокуускай баһылыга Сардаана Авксентьева эттэ.
Саха сиринээҕи ИДьМ иһитиннэрбитинэн, араҥаччылыыр уорганнар мааска эрэсиимин тутуһууга рейдэлэри ыыталларын салгыыллар.
Түмүккэ суһал ыстаап оскуолаларга күһүҥҥү каникул саҕаламмытынан оҕолор уопсастыбаннай сирдэргэ сылдьыыларын аччатыахха наадатын туһунан бэлиэтээтэ.
Ил Дархан уонна Бырабыыталыстыба пресс-сулууспата.
Андрей Сорокин хаартыската.