Ил Дархан суһал ыстаап чилиэннэригэр саҥа соруктары туруорда

Бөлөххө киир:

Саха сиригэр эпидемиологическай балаһыанньа билигин даҕаны уустук. Онон өрөспүүбүлүкэ суһал ыстаабыгар ыарахан уонна орто туруктаах ыарыһахтарга анаан куойканы элбэтэр туһунан саҥа соруктар туруорулуннулар.

Маны сэргэ анаалыстары тиэрдии үлэтэ күүһүрүөҕэ. Сыананы кэтээн көрүү, аптекаларга, мэдиссиинэ тэрилтэлэригэр эмп тиийэрин бэрэбиэркэлээһин үлэтэ салҕаныаҕа. Бу туһунан, Ил Дархан Айсен Николаев суһал ыстаабы кытта мунньахха кэпсэттэ.

Айсен Николаев анаалыстары ПЦР-га тиэрдии болдьоҕун кыччатыы туһунан сорук туруорда. «Дьон анаалыс түмүгүн 3-4 күн иһигэр тутуохтаахтар. Сороҕор 7-10 күҥҥэ диэри күүппүт түбэлтэлэрэ да баар», — диэн Ил Дархан бэлиэтээтэ.

Мунньахха колл-кииннэр үлэһиттэрин элбэппиттэрин туһунан иһитиннэрдилэр, онон манна эрийэр дьон күүтэр бириэмэлэрэ кыччаан биэрдэ.

Саха сирин вице-премьерэ, суһал ыстаап салайааччытын солбуйааччы Ольга Балабкина бэлиэтииринэн, өрөспүүбүлүкэ муниципальнай тэриллиилэрэ уонна куораттара Ил Дархан тэйиччиттэн олорон үлэҕэ көһүү уонна дьиэ кэргэнигэр дьаҥнаабыт киһи үлэлээбэтин туһунан ыйааҕа туолан иһэрин эттэ.

Оттон Доруобуйа харыстабылын миниистирэ Елена Борисова ааспыт сууккаҕа «суһал көмөҕө» наадыйааччы ортотунан 30 % аччаабытын эттэ. Холобура, бэҕэһээ Дьокуускайдааҕы «Суһал көмө» диспетчерин сулууспатыгар 2 635 ыҥырыы уонна 3 920 төлөпүөнүнэн эрийэн тиийии бэлиэтэммит.

Дьокуускай территориятыгар атыы-эргиэн, уопсастыбаннай аһыыр, сынньанар сирдэргэ санитарнай-эпидемиологическай ирдэбиллэр хонтуруолланаллар. Ааспыт кэрчиккэ 161 эбийиэк бэрэбиэркэлэммит, 31 кэһии туһунан боротокуол оҥоһуллубут. Суут быһаарыытынан, биир маҕаһыын уонна биир кафе үлэтэ 30 күҥҥэ тохтообут.

Дьокуускайга буолуохтаах рейдэлэр өссө күүһүрдүллэн ыытыллыахтара. Өрөбүлгэ уонна бэнидиэнньиккэ атыы-эргиэн эбийиэктэрэ санитарнай сууйууну-сотууну ыыппыттара хонтуруолланыаҕа.

Суһал ыстаап мунньаҕын түмүктээн, Айсен Николаев холкутуйар өссө даҕаны эрдэтин эттэ. Балаһыанньа бигэтийэрин туһуттан доруобуйа харыстабылын, хонтуруоллуур-кэтиир, быраабы араҥаччылыыр уонна бэйэни салайыныы уорганнара сомоҕолоһон үлэлиэхтээхтэрин туһунан бэлиэтээн эттэ.

Ил Дархан уонна бырабыыталыстыба пресс-сулууспата.

+1
0
+1
0
+1
0
+1
0
+1
0
+1
0
+1
0