Айсен Николаев коронавирус дьаҥа салгыы тарҕамматын туһуттан Суһал ыстаабы кытта мунньахтаата. Ил Дархан сорудахтар төһө туолан иһэллэрин бэрэбиэркэлээтэ уонна саҥа соруктары туруорда.
Бүгүн Суһал ыстаап иһитиннэрбитинэн, ааспыт сууккаҕа өрөспүүбүлүкэбитигэр 120 киһи коронавируска сутуллубут. Онтон 80 киһи Дьокуускайга, 7-лии киһи Алдаҥҥа, Мэҥэ Хаҥаласка, 5-тии киһи Үөһээ Бүлүүгэ, Мииринэйгэ, 4 киһи Нерюнгрига, 3-түү киһи Хаҥаласка, Намҥа, 2-лии киһи Бүлүүгэ, Томпоҕо уонна 1 киһи Сунтаарга ыалдьыбыт.
Ил Дархан ыраах баар нэһилиэктэргэ дьаҥ тиийбититтэн дьиксиммитин эттэ. Холобура, Алдан оройуонун Кутанатыгар. Вице-премьер Ольга Балабкина иһитиннэрбитинэн, билигин онно миэдиктэр биригээдэлэрэ үлэлиир. Сэлиэнньэҕэ тустаах эми тиэрдибиттэр, эбии куойкалары тэрийбиттэр.
Оттон Дьокуускай баһылыга Сардаана Авксентьева иһитиннэрбитинэн, манна атыы-эргиэн, уопсастыбаннай аһыыр сирдэринэн рейдэ буолар. Айсен Николаев бэрэбиэркэни өссө күүһүрдэр уонна оройуоннарга рейдэни ыытар туһунан эттэ.
Саха сирин кылаабынай санитарнай бырааһа Маргарита Игнатьева нэһилиэнньэ кириип уонна ОРВИ утары вакцина ыларын, уопсай нэһилиэнньэттэн 60% киһи ылыахтааҕыттан, билигин номнуо 36,8% киһи вакциналаммытын иһитиннэрдэ. Инньэ гынан, былаан улахан дьоҥҥо 53,4% , оттон оҕолорго 74% туолбут. Быһыыны ылыыга ордук Дьокуускай хаалан иһэр эбит, манна нэһилиэнньэ 32%-на эрэ ылбыт. Онтон Мииринэй, Үөһээ Халыма, Өлүөхүмэ, Өлөөн, Чурапчы, Эбээн Бытантай улуустара иһэллэр.
Маны сэргэ Маргарита Игнатьева тас дойдулартан кэлэр дьону эмиэ хонтуруоллуулларын туһунан эттэ. Ол курдук, 1815 киһи «госуслуга» саайтын нөҥүө анаалыстарын түмүктэрин туһунан дааннайдары киллэрбиттэр. Маны толорботох дьон административнай эппиэтинэскэ тардыллаллар.
Айсен Николаев социальнай ситимнэргэ 65-ттэн үөһэ саастаах дьон үөрэх тэрилтэлэригэр үлэлии тахсалларын туһунан этиилэр киирэллэрин бэлиэтээтэ. Кини тэйиччиттэн үлэ эрэсиимин күүһүрдэр туһунан соруйда. Бу, бастатан туран, бүддьүөт үлэһиттэригэр сыһыаннааҕын эттэ.
Ил Дархан уонна бырабыыталыстыба пресс-сулууспата.
Андрей Сорокин хаартыскалара.