Ил Дархан «Демография» уонна «Доруобуйа харыстабыла» нацбырайыактар тула мунньахтаата
Коронавирус пандемията мэһэйдээн, «Демография» уонна «Доруобуйа харыстабыла» национальнай бырайыактар сорох тэрээһиннэрэ олоххо киирэллэригэр мэһэйдэр үөскээтилэр. Ол да буоллар өрөспүүбүлүкэ үрдүнэн бу бырайыактар туолуулара үчүгэйдик сыаналанар. Бу туһунан бүгүн мунньахха Ил Дархан Айсен Николаев эттэ.
СӨ вице-премьера Ольга Балабкина этэринэн, Саха сирин сиригэр-уотугар «Демография» национальнай бырайыак 25 көрдөрүүнэн биэс эрэгийиэннээҕи бырайыагынан олоххо киирэр.
Ол курдук, «Дьахтах дьарыктаах буолуута» эрэгийиэннээҕи бырайыак иһинэн Сунтаарга 240 миэстэлээх, Ньурбаҕа 280 миэстэлээх уһуйааннар тутулла тураллар. 2020 сыл бүтүүтэ арыллыахтаахтар. Маны таһынан, алтынньы 15 күнүгэр диэри Үөрэх министиэристибэтэ уонна Дьокуускай куорат уокуруктааҕы дьаһалтата киин куорат 65 кыбаарталыгар «Прометейчик» уһуйаан эбии бөлөхтөрүн дьиэнэн хааччыйыы туһунан сөбүлэһии түһэрсиэхтээхтэр.
Оттон эрэгийиэннээҕи «Аҕа көлүөнэ» бырайыак чэрчитинэн Бүлүү Сосновкатыгар 150 миэстэлээх психоневрологическай интэринээт-дьиэ 2021 сылга үлэҕэ киириэҕэ. Билигин тутуу 60 бырыһыана түмүктэммит. «Спорт — норма жизни» бырайыагынан Аллараа Бэстээххэ успуорт саалата тутулла турар.
Оттон «Доруобуйа харыстабыла» национальнай бырайыак сэттэ эрэгийиэннээҕи бырайыак нөҥүө олоххо киирэр.
Миниистир Елена Борисова иһитиннэрбитинэн, балыыһаларга көрдөрүү уонна диспансеризация саҕаламмыттарынан сыл бүтүөр диэри сыал 100 бырыһыан туолара күүтүллүбэт эбит.
Айсен Николаев бу икки национальнай бырайыак олоххо киириилэрэ өрсөпүүлүкэҕэ куһаҕана суохтук баран иһэллэрин бэлиэтээтэ. «Кэккэ биричиинэлэринэн сорох көрдөрүүлэр сатаан туолбаттар. Ол да буоллар, эпидемиологическай балаһыанньаттан тутулуга суох толоруллуохтаах көрдөрүүлэр бааллар. Холобура, эбийиэктэри тутуу. Бу сыл бүтүүтэ үлэҕэ киириэхтээх эбийиэктэр бары болдьохторугар түмүктэниэхтээхтэр», — диэн Ил Дархан мунньаҕы түмүктээтэ.
СӨ Ил Дарханын уонна бырабыыталыстыбатын пресс-сулууспата.
Андрей Сорокин хаартыскалара.