Ил Дархан: «Стратегическай ыйаахтар туолаллара муниципалитеттан толору тутулуктаах»
Балаҕан ыйын 25 күнүгэр Саха Өрөспүүбүлүкэтин олохтоох бэйэни салайыныы Сэбиэтин мунньаҕар Ил Дархан 2024 сылга диэри эрэгийиэн сайдыытын Стратегическай ыйаахтарын олоххо киириитин тула кэпсэттилэр.
edersaas.ru
Билиҥҥи туругунан, өрөспүүбүлүкэҕэ сэттэ стратегическай ыйаах үлэлиир:
- Экология бигэ туруктаах буолуута;
- Олох-дьаһах, экэниэмикэ сайдыыта;
- Инновационнай уонна цифровой сайдыы;
- Үөрэхтээһин сайдыыта;
- Тыа хаһаайыстыбатын сайдыыта;
- Арктика зонатын сайыннарыы;
- Судаарыстыбаннай салайыыны тупсарыы.
Бу үөһэ этиллибит салаалар бары 2024 сылга диэри бигэ тирэхтэрин булбут, олохтоох нэһилиэнньэ олоҕун-дьаһаҕын хаачыстыбатыгар дьэҥкэ көстөр буолуохтаахтар.
Санатар буоллахха, бу күннэргэ Айсен Николаев Ил Дархан дуоһунаһыгар киирбитэ, ону кытта Стратегическай ыйаахтар бигэргэммиттэрэ иккис сыла туолар.
Айсен Николаев бу былааннар туолалларыгар муниципальнай тэриллиилэр быһаччы эппиэтинэстэригэр сытар диэн тоһоҕолоон эттэ. Олохтоох бэйэни салайыныы уоргана бүтүн өрөспүүбүлүкэ сайдыытын кэрэһэлиир. Онон бу ыйаахтары толорууга дириҥ хорутуулаахтык, иҥэн-тоҥон үлэлэһэр наадатын ыйда.
«Стратегическай ыйаахтар, билиҥҥи туругунан, олоххо киирэн иһэр тэтимнэрэ үчүгэй. Ол эрээри сорох боппуруостарга муниципалитеттар туора тураллар баар суол. Ис-иһигэр киирдэххэ, бу соруктар өрөспүүбүлүкэ бүттүүнүн, хас биирдии киһитин хабалларын ааһан, инникибитин түстүүр аналлаахтар. Хас биирдии улуус ону өйдүөх тустаах», – диэн Ил Дархан муниципалитет баһылыктарыгар туһаайан эттэ.
Манна, Айсен Сергеевич этэринэн, үлэ былааннанан, тиһиктэнэн, итиэннэ былаас бары таһымын – бырабыыталыстыбаттан саҕалаан, министиэристибэлэри, биэдэмистибэлэри иилии хабан, оройуон, нэһилиэк дьаһалталарын түмэ тардан, сүбэлэрин холбоон ыытыллыахтаах.
Түмүккэ Ил Дархан үрдүкү салалтаҕа сыл бүтүөр диэри Стратегическай ыйаах 500-тэн тахса көрдөрүүтэ улуустарга төһө туолан иһэрин биир тиһиккэ угар платформаны оҥорууну түмүктээҥ диэн соруйда.
Оттон министиэристибэлэр, биэдэмистибэлэр көрүүлэригэр Стратегическай ыйаахтар соруктарын толоруу былааныгар муниципалитеттар эппиэтинэстэригэр киирсэр тэрээһиннэри хайаан да киллэрэргэ диэн эттэ.
Айсен Николаев инникитин улуустарга барар түгэммэр, Стратегическай ыйаахтар туолууларын тус бэйэм хонтуруолбар ылабын диэн эттэ. Маны таһынан, муниципалитет баһылыктара салайар сирдэригэр-уоттарыгар бу Ыйаахтар туолууларын туһунан иһитиннэрии ыытар буолуохтара.