СӨ Судаарыстыбаннаһын күнүн көрсө бэҕэһээ, балаҕан ыйын 25 күнүгэр, Ил Дархан Айсен Николаев экэниэмикэ, бырамыысыланнас, социальнай уонна култуура эйгэтигэр үрдүк ситиһиилэрдээх дьоҥҥо наҕараадалары туттарда.
Айсен Николаев 30 сыллааҕыта, 1990 сыл балаҕан ыйын 27 күнүгэр, Михаил Ефимович Николаев салайааччылаахҮрдүкү Сэбиэт дьокутааттара СӨ суверенитетин туһунан декларацияны ылыммыттара диэн бэлиэтээн эттэ. «Бу сыллар тухары өрөспүүбүлүкэбитигэр элбэх уларыйыылар буоллулар. Билигин Саха сирэ Уһук Илиҥҥэ экэнэмиичэскэй үрдээһиҥҥэ лиидэр буолар, киһи хапытаалын сайыннарарыгар бары усулуобуйа баар. Элбэх омук олорор өрөспүүбүлүкэбитинэн киэн туттабыт», — диэн Ил Дархан тыл эттэ.
«Учуонайдар, култуура, үөрэх диэйэтэллэрин ситиһиилэринэн Саха сирэ тылы, култуураны, норуоттар үгэстэрин харыстыыр Хоту дойду уонна Арктика киинэ буолар. Бүгүн эһиэхэ ытыктабылбын биллэрэбин. Эһиги араас хайысхаларга үлэлиигит, ол эрээри барыгытын Саха сиригэр уонна олохтоохторго тапталгыт биир гына түмэр. Үлэҕит иһин махтанабын», — диэн Ил Дархан үөрүүлээх тэрээһиҥҥэ мустубут дьоҥҥо туһаайан эттэ.
Итиннэ диэн туран Айсен Николаев РФ уонна өрөспүүбүлүкэ үрдүкү наҕараадаларын туттарда. Наҕараадаламмыттар ааттарыттан Бочуот уордьанын кавалера, РФ уонна Саха АССР үтүөлээх бырааһа, мэдиссиинэ наукатын доктора, профессор Иван Егоров харда тыл эттэ: «Наҕараадаламмыттар ааттарыттан биһиги Саха сирин социальнай-экэнэмиичэскэй сайдыытыгар үлэбит сыаналаммытыттан өрөспүүбүлүкэбит баһылыгар Айсен Сергеевич Николаевка махтанабыт. Мин үлэбинэн өрөспүүбүлүкэ оройуоннарыгар, дойду атын кыраайдарыгар, уобаластарыгар сылдьабын уонна, кырдьык даҕаны, биһиги Сахабыт сирэ тэтимнээхтик сайдан иһэр эбит диэн санааҕа кэлэбин. Бу манна өрөспүүбүлүкэ салалтатын, бырабыыталыстыбатын уонна бары олохтоохторун өҥөтө үгүс».
Бу күн «РФ култууратын үтүөлээх үлэһитэ» бочуоттаах аат Г.М.Кривошапко аатынан Судаарыстыбаннай филармония уус-уран салайааччытыгар Наталья Базалеваҕа, «РФ физическэй култууратын үтүөлээх үлэһитэ» бочуоттаах аат Дьокуускай куорат 4-с №-дээх Оҕо спортивнай оскуолатын дириэктэригэр Альберт Трофимовка, «РФ үтүөлээх учуутала» бочуоттаах аат Сунтаар улууһун И.С. Иванов аатынан 2-с №-дээх оскуолатын химияҕа учууталыгар Надежда Иванова иҥэрилиннэ.
Улуу Кыайыы 75 сылынан, Арассыыйаҕа Умнуллубат Албан аат, Саха сиригэр Дойдуга бэриниилээх буолуу сылынан «Хотугу сулус» уордьанынан Аҕа дойду сэриитин кыттыылаахтара Петр Кириллович Конкин уонна Ксенофонт Николаевич Пшенников наҕараадаланнылар. Сэрии кыттыылааҕа Петр Константинович Яковлев Саха сирин бочуоттаах олохтооҕо буолла.
Сэрии кыттыылааҕа Алексей Вересовай П.И. Дудкин аатынан, Муусука уонна норуоттар фольклордарын мусуойун научнай-просветительскай салаатын сэбиэдиссэйэ Аиза Решетникова А.Е.Кулаковскай аатынан бириэмийэлэри туттулар.
edersaas.ru
Андрей Сорокин хаартыскаҕа түһэриилэрэ.