Ил Дархан Айсен Николаев бүгүн социальнай ситиминэн тахсан нэһилиэнньэ ыйытыытыгар хоруйдууругар үгүстэр оскуола үлэтин туһунан туоһуластылар.
edersaas.ru
— Бүгүн өрөспүүбүлүкэтээҕи суһал штаб мунньаҕа буолла. 5000-тан кыра нэһилиэнньэлээх пууннар оскуоларыгар үөрэх уруккутун курдук (обычный режим) барар. Биллэн турар, бары санитарнай-эпидемиологическай миэрэлэри тутуһан.
5000-тан элбэх нэһилиэнньэлээх пууннарга (өрөспүүбүлүкэҕэ, уопсайа 27 маннык нэһилиэнньэлээх пуун баар) биһиги, кыаллар буоллаҕына үөрэҕи урукку курдук үөрэтэргэ сүбэлиибит. Өскөтүн, кылааска элбэх оҕо үөрэнэр, оскуолалара кыараҕас эҥин буоллаҕына, олоҕурбут көрүҥүнэн (очно) 1-4 уонна 9-с, 11-с кылаастары (сүрүн биридимиэттэригэр) үөрэтэргэ этэбит. Онтон ураты 5-8 уонна 10-с кылаастар ыраахтан олорон (дистанционно) үөрэниэхтэрэ. Ханнык эрэ уруоктар оскуолаҕа (очно) буолуохтарын сөп, биллэн турар, кыра бөлөҕүнэн, – диэн Ил Дархан хоруйдаата.
Онтон анал (специальнай) оскуолалар эмиэ олоҕурбут көрүҥүнэн (очно) үөрэнэллэр диэн иһитиннэрдэ.
“Маннык бастакы чиэппэр устата үөрэниэхтэрэ. Салгыы балаһыанньа хайдаҕыттан көрүөхпүт”, — диэн эттэ.
Людмила ПОПОВА, “Саха сирэ” хаһыат, edersaas.ru