Бүгүн, атырдьах ыйын 27 күнүгэр, Саха сиригэр 44 киһи коронавирустаабыта биллибит. Ити уонна үөрэх тэрилтэлэрэ хайдах үлэлииллэрин туһунан СӨ Ил Дархана Айсен Николаев брифинг кэмигэр иһитиннэрдэ.
edersaas.ru
Итинтэн Дьокуускай куоракка 20, Өлөөҥҥө 5, Мииринэйгэ, Мэҥэ Хаҥаласка үстүү, сорох улуустарга биирдии-иккилии түгэн бэлиэтэммит. Күн бүгүн 25 киһи ыарахан туруктаах сытар, түөрт киһи ИВЛ аппараатыгар холбоммут.
Ил Дархан Айсен Николаев иһитиннэрбитинэн, ыалдьыбыт дьон ахсаана сыыйа аҕыйаан иһэр эбит. “Күҥҥэ 45 эбэтэр оннооҕор аҕыйах киһи ыалдьыбыта биллэр. Итинтэн аҥаара Дьокуускай куоракка. Эрдэ 80 бырыһыаҥҥа тиийэ этэ. Хамсык тарҕаныытын коэффициена 0,9 тэҥнэһэр. Өрөспүүбүлүкэ кылаабынай санитарнай бырааһа хааччахтааһыны уһатарга суругун киллэрбитэ. Бүгүн туһааннаах ыйаах тахсыаҕа. Биллэн турар, сымнатыы, холобур, култуура тэрилтэлэригэр, о.д.а. биллэриллиэҕэ. Миэхэ бассейннар, киинэ тыйаатырдарын туһунан үгүс ыйытыы киирэр. Балары балаҕан ыйын 15 күнүттэн аһарга быһаардыбыт.
Бүгүҥҥү суһал штаб мунньаҕар үөрэх тэрилтэлэрин туһунан сиһилии ырытыстыбыт. Уһуйаантан саҕалаан үрдүк үөрэх кыһаларыгар тиийэ балаҕан ыйын 1 күнүттэн үлэлэрин саҕалыыллар. Уопсайынан, өрөспүүбүлүкэҕэ үөрэх олохсуйбут (очно) көрүҥүнэн саҕаланар. Биллэн турар, хас биирдии бөлөххө, тэрилтэҕэ миэстэтигэр тус-туспа быһаарыы ылыныллыаҕа”, — диэн иһитиннэрдэ.
— Уһуйааннар туох баар саҥа ирдэбили тутуһан балаҕан ыйын 1 күнүттэн олохсуйбут (очно) көрүҥүнэн үлэлииллэр.
— 5000-ҕа диэри нэһилиэнньэлээх пууннарга санитарнай ирдэбили тутуһан оскуолалар олохсуйбут (очно) көрүҥүнэн үөрэнэллэр. 5000-тан тахса нэһилиэнньэлээх пууннарга ирдэнэр түгэнигэр 1-4 кылаастары уонна 9-с, 11-с кылаастары олохсуйбут көрүҥүнэн оскуолаҕа миэстэтигэр (очно) үөрэтэргэ сүбэлииллэр. Онтон атыттар ыраахтан олорон (дистанционно) үөрэниэхтэрин сөп. Ирдэнэр түгэнигэр, сорох уруоктар оскуолаҕа ыытыллыахтарын сөп.
“Бу сүбэ (рекомендация) эрэ буолар. Бүтэһиктээх быһаарыыны миэстэтигэр улуус, куорат уокуругун баһылыктара ылаллар. Дьокуускай куорат туһунан бүгүн мээри кытта кэпсэттибит уонна куорат уокуругар киирэр бөһүөлэктэргэ оҕолор олоҕурбут көрүҥүнэн үөрэниэхтэрэ диэн быһаардыбыт. Онтон Дььокуускай куоракка сүбэлээбиппит курдук (рекомендациянан) үөрэнэллэр. Онон бүтэһиктээх быһаарыыны улуус, куорат баһылыктара ылаллар”, — диэн эттэ.
— Орто анал уонна үрдүк үөрэх тэрилтэлэрин 1 кууруһун устудьуоннара олохсуйбут (очно) көрүҥүнэн үөрэнэллэр. Онтон атын куурустар балаҕан ыйыгар ыраахтан олорон (дистанционно) үөрэнэллэр эбэтэр быраактыкаланаллар. Салгыы балаһыанньа үчүгэй буоллаҕына алтынньы 1 күнүттэн урукку курдук кыһаларыгар тиийэн үөрэниэхтэрэ диэн эттэ.
Билигин дьаҥ үксүүр кэмэ буолан (ОРВИ, грипп) Ил Дархан, төрөппүттэр эппиэтинэстээхтик сыһыаннаһан, оҕолоругар гирииптэн утары быһыыны туруоттаралларыгар ыҥырда.
Людмила ПОПОВА, “Саха сирэ” хаһыат, edersaas.ru