Ил Дархан медиктэргэ эбии төлөбүр көрүллүүтүн тус бэйэтинэн хонтуруоллаата

Ааптар: 
Бөлөххө киир:

СӨ Ил Дархана Айсен Николаев ыам ыйын 18 күнүгэр коронавируһу утары үлэҕэ сылдьар мэдиссиинэ үлэһиттэрэ федеральнай уонна эрэгийиэнтэн көрүллэр көҕүлүүр төлөбүр тиийиитин тус бэйэтинэн хонтуруоллаата.

edersaas.ru

Айсен Николаев Алдан, Ленскэй, Нерюнгри уонна Дьокуускай куорат Суһал көмөҕө ыстаансыйатын инфекционист быраастарын уонна рентгенологтарын кытта төлөпүөнүнэн кэпсэттэ. Ил Дархан Саха сирин дьонун олохтоохторун доруобуйаларын туһугар бэйэлэрин харыстаммакка күннэтэ үлэлииллэрин иһин махталын биллэрдэ.

Быраастарга, биэлсэрдэргэ, сиэстэрэлэргэ хайдах курдук ноҕурууска сүктэриллибитин бэркэ билэбит. Коронавируһу утары охсуһуу инники кирбиитигэр сылдьаҕыт. Өрөспүүбүлүкэ олохтоохторун ааттарыттан улахан махталбын билллэрэбин. Эрэгийиэннээҕи уонна федеральнай эбии төлөбүрү барытын туппукутун билиэхпин баҕарабын”, — диэн мэдиссиинэ үлэһиттэригэр туһаайан эттэ.

Быраастар, Ил Дархаҥҥа кыттыбытын уонна үтүө тылларын, коронавируһу кытта быһаччы үлэлии сылдьар мэдиссиинэ үлэһиттэригэр үрдүк сыанабылы биэрбитин иһин махтаннылар. Федеральнай уонна эрэгийиэннээҕи эбии төлөбүр кэмигэр төлөммүтүгэр туспа махтаннылар.

РФ бэрэсидьиэнэ Владимир Путин, РФ Бырабыыталыстыбатын уонна СӨ Ил Дарханын дьаһалынан көрүллүбүт кулун тутар уонна муус устар ыйдааҕы көҕүлүүр төлөбүрү толору ыллыбыт. Хамнаспытын эбии үлэлээбиппитин учуоттаан биэрбиттэрэ, ыам ыйынааҕы абаансаны эмиэ ыллыбыт. Күүстээх эрэсииминэн үлэбитин салҕыыбыт. Аһылыгынан,  тус харыстыыр сириэстибэнэн толору хааччыйаллар”, — диэн Өрөспүүбүлүкэтээҕи клиническэй балыыһа инфекционист бырааһа Наталья Портнягина кэпсиир.

Нерюнгри киин балыыһатын инфекционнай салаатын быраастара, орто уонна алын медицинскэй үлэһиттэрэ бары көҕүлүүр үс көрүҥ төлөбүрүн ылбыттарын тустаах салаа сэбиэдиссэйэ Екатерина Симонова бигэргэтэр. Итиэннэ оройуоҥҥа эпидемиологическай балаһыанньа бүтэһик күннэргэ бигэ туруктааҕын бэлиэтиир.

Айсен Николаев COVID-19 ыарыыны бохсууга быһаччы үлэлэһэр мэдиссиинэ үлэһиттэригэр ыам ыйынааҕы көҕүлүүр төлөбүрү эмиэ биэрэргэ дьаһайбытынын иһитиннэрдэ. Бу күннэргэ ыам ыйынааҕы төлөбүрү ыытан саҕалыахтара.

Мин муус устар ыйга Суһал көмө инфекционнай биригээдэтин састаабыгар үлэлээбитим. Үлэлээбит кэммитигэр эрэгийиэннээҕи уонна федеральнай төлөбүрү биһиги биригээдэбит бары ылбыта, улаханнык махтабыт”, — диэн Дьокуускай куораттааҕы Суһал көмө ыстаансыйатын биэлсэрэ Иван Токосов эттэ.

Ленскэй оройуонун киин балыыһатын инфекционист бырааһа Татьяна Старцева Ил Дархаҥҥа көрүллүбүт төлөбүр иһин махтанна. Бүгүн-сарсын ыам ыйынааҕы төлөбүр киириэхтээх диэн иһитиннэрдэ. Кэпсэтии кэмигэр Татьяна Ивановна  өрөспүүбүлүкэ Ил Дарханыттан инфекционнай салаа үлэһиттэригэр ыарыыттан харыстыыр көстүүмүнэн хааччыйарга көрдөстө. Айсен Николаев боппуруоһу тус хонтуруолбар ылыам диэн хоруйдаата. “РФ бэрэсидьиэнин Уһук Илин уокурукка боломуочуйалаах бэрэстэбиитэлэ Юрий Трутнев өйөбүлүнэн Уһук Илин биир бөдөҥ хампаанньатыттан эрэгийиэҥҥэ гуманитарнай көмө кэллэ. Онно көстүүмнэр эмиэ бааллара. Ленскэйгэ эмиэ ыыталларын курдук дьаһайыам”, — диэтэ Айсен Сергеевич.

Алдан киин балыыһатын рентгенолога Андрей Парников медиктэр бары көрүллэр төлөбүрү ыллылар диэн эттэ. “Эрэгийиэннээҕи уонна федеральнай төлөбүрдэр кэмигэр киирбиттэрин иһин махтанабыт. Алдаҥҥа эпидемиологическай балаһыанньа оннун булан эрэр. Билигин балыыһаҕа 17 киһи эмтэнэ сытар, бүгүн икки киһи тахсыахтаах. Уопсайынан, Алдан оройуонугар 40 киһи үтүөрдэ”, — диир.

Ил Дархан медиктэргэ лоп курдук, табыгастаах үлэлэрин иһин махтанна уонна быраастар, сиэстэрэлэр уонна алын персонал көмөтүнэн өрөспүүбүлүкэҕэ эпидемиологическай балаһыанньа оннун буларыгар, ыарыыны кыайалларыгар эрэллээҕин биллэрдэ.

СӨ Ил Дарханын уонна Бырабыыталыстыбатын пресс-сулууспата.

+1
0
+1
0
+1
0
+1
0
+1
0
+1
0
+1
0