Ил Дархан: «Чайыҥдаҕа 39 киһи ыалдьыбытын Роспотребнадзор анаалыһа көрдөрөр»
Ыам ыйын 3 күнүнээҕи туругунан Саха сиригэр суукка устата 19 киһи ыалдьыбыт. Итинтэн 17 киһи — Дьокуускайга. Инньэ гынан, өрөспүүбүлүкэҕэ, уопсайа, 282 киһиэхэ коронавирус баара биллибит. Ити туһунан Ил Дархан Айсен Николаев брифинг кэмигэр иһитиннэрдэ.
edersaas.ru
Дьокуускайы таһынан, 1 киһи Ленскэйгэ, 1 киһи Мэҥэ Хаҥаласка ыалдьыбыттар. «Ленскэйгэ, Мэҥэ Хаҥаласка баахтабай үлэһиттэртэн сыстыбыттар. Оттон Дьокуускай куоракка, хомойуох иһин, харах балыыһатыттан тарҕаныы салгыы бэлиэтэнэр. Бүгүҥҥү күҥҥэ номнуо 50 киһиттэн таҕыста. Үлэ салгыы барар. Өссө элбэх киһи ыалдьыбыт буолуон сөп«, — диэн эттэ. Маны тэҥэ, билигин Саха сиригэр сууккаҕа 2,5 тыһыынча коронавируска тест оҥороллорун ыйда.
«Ленскэйгэ саҥа ПЦР лаборатория үлэлээн саҕалаан эрэр. Бу «Стройтрансгаз» үбүнэн ылылынна. Онон Чайыҥдаҕа хас үлэһит ыалдьыбытын миэстэтигэр быһаарар кыах үөскүүр. Хомойуох иһин, араас сыыппара этиллэр, тыһыынчанан даҕаны дииллэр. Оннук буолбатах. Күн бүгүн Роспортебнадзор лабораториятын анаалыһынан бигэргэммитинэн 39 түгэн бэлиэтэнэр. Итинтэн 23 киһи Саха сирин уонна Ямал-Ненец автономнай уокуругун балыыһаларыгар эмтэнэллэр. Онтон 16 киһи баахтабай бөһүөлэккэ бэйэтигэр тэриллибит обсерваторга, изоляторга сытан чэпчэкитик аһарар дьон.
Ону таһынан, 50 киһини Омскайга илдьибиттэрэ. Анаалыс ылыллыбыта эрээри, түмүгүн биһиэхэ биллэрэ иликтэр«, — диэн быһаарда.
«Газпром» уонна тустаах тэрилтэ бэдэрээтчиттэрин өйөбүллэринэн иккис тестирование оҥоһуллар. Бу анаалыс Чайыҥдатааҕы ньиэп-гаас хостонор сиригэр хас киһи чопчу ыалдьыбытын көрдөрүөхтээх диэтэ. Билигин болдьохторо бүппүт доруобай дьону дьиэлэригэр илдьии саҕаланыахтаах. Мин санаабар, бүгүн номнуо бастакы 100 киһини хантан кэлбит сирдэригэр, бэйэлэрин эрэгийиэннэригэр илдьиэхтэрэ», — диэн Ил Дархан иһитиннэрдэ.
Чайыҥдатааҕы ньиэп-гаас хостонор сирин РФ бырабытаалыстыбатын салалата, суһал штаб, Татьяна Голикова, Юрий Трутнев хонтуруоллуулларын Айсен Николаев санатта. Чайыҥдатааҕы түгэн Саха сирин даҕаны, Арассыыйа даҕаны эпидемиологическай балаһыанньатыгар дьайбатын ыйда.
Людмила ПОПОВА, edersaas.ru