Бу киэһэ Ил Дархан Айсен Николаев инстаграмҥа Өрөспүүбүлүкэ күнүнэн «Быһа эпиир» ыытта.
edersaas.ru
Бастакынан Аҕа баһылык Айсен Николаев Саха сирин судаарыстыбаннай уонна бэлитиичэскэй диэйэтэлэ Михаил Николаевы кытта кэпсэттэ.
Өрөспүүбүлүкэ бастакы бэрэсидьиэнэ Михаил Николаев саха норуота өрспүүбүлүкэ Автономиятын олохтообут Максим Аммосов, Былатыан Ойуунускай, Степан Аржаков, Исидор Барахов ааттарынан киэн туттарын бэлиэтээтэ.
— Сахабыт сирэ Автономияны ылыммыт күнүн уустук балаһыанньаҕа бэлиэтии олоробут. Биһиги эрэ буолуо дуо, аан дойду барыта сысытыганнаах дьаҥҥа ылларан олорор кэмэ. Манан сибээстээн, Айсен Сергеевич, мэдиссиинэ уонна доруобуйа харыстабылын боппуруостарыгар, доруобуйа харыстабылыгар үлэлиир эмчиттэргэ улахан болҕомтону уураргар көрдөһөбүн.
Аччыгый уонна дьоҕус биисинэскэ үлэлиир дьоҥҥо аҥардас субсидия, босуобуйа курдук боппуруостарынан эрэ буолбакка, тустаах көмөнү оҥорууга үлэлэһиэххэ. Холобура, судаарыстыбаннай тэрилтэлэр дьиэлэрин-уоттарын урбаанньыттарга өйөбүл быһыытынан босхо арендалыахтарын сөп.
Айсен Сергеевич, эн олус эппиэтинэстээх үлэлээххин. Түүннэри үлэлиигин. Кытаатан бэйэҕин эмиэ харыстан, — диэн бэлиэтээтэ Михаил Николаев.
Сыстыганнаах дьайы утары бохсууга өрөспүүбүлүкэ салалтата ирдэбиллээх үлэни ыытарын, сөптөөх кэккэ миэрэлэр кэмигэр ылыллан иһэллэрин өрөспүүбүлүкэ Бастакы бэрэсидьиэнэ тоһоҕолоон эттэ.
— Биир дойдулаахтарбын анаан ыҥырыам этэ — Ил Дархаммыт ыытар үлэтин өйүөҕүҥ. Сыстыганнаах ыарыыны бохсор ирдэбили — дьиэҕэ олорор эрэсиими кытаанахтык тутуһуоҕуҥ,— диэн Михаил Николаев Саха сирин олохтоохторун ыҥырда.
Ил Дарханы кытта Максим Аммосов аатынан Нам улууһунааҕы Хатырык судаарыстыбаннай мусуойун дириэктэрэ Александр Кириллин быһа тахсан, саха дьонугар өрөспүүбүлүкэ судаарыстыбаннаһын туруорсубут бэлитиичэскэй диэйэтэллэр хас биирдиилэрин оруолун, Максим Аммосов үлэтигэр тутта сылдьыбыт тэриллэрин сиһилии кэпсээтэ.
Ил Дарханы кытта быһа эфиргэ Камчатка уобалаһыттан губернатор Владимир Солодов, Нерюнгри оройуонун Иенгратыттан 14 оҕону иитэр Юдинцевтар элбэх оҕолоох дьиэ кэргэттэрэ
Москваттан Саха сирин аан дойдуга аатырда сылдьар, виртуоз-хомусчут Ольга Подлужная-Уутай,
Былатыан Ойуунускай аатынан Саха академическай тыйаатырын артыыһа, судаарыстыбаннай бириэмийэ лауреата,
СӨ үтүөлээх артыыһа Иннокентий Луковцев тахсан кэпсэттилэр, саха дьонугар бэйэлэрин эҕэрдэлэрин тиэртилэр.
Елена ПОТОЦКАЯ, «Саха сирэ» хаҺыат, edersaas.ru