Ил Дархан Айсен Николаев социальнай ситимнэринэн быһа сибээскэ тахсан, нэһилиэнньэни долгутар ыйытыыларга хоруйдаата. Ол иһигэр үөрэх боппуруостарын эмиэ таарыйда.
Ыйытыы: Оскуола үөрэнээччилэригэр сынньалаҥ хаһааҥҥыттан саҕаланыай?
Хоруй: Өрүү буоларын курдук, 9-с уонна 11-с кылаастартан ураты кылаастарга ыам ыйын бүтүүтэ буолуоҕа. Биир кэлим эксээмэн (ЕГЭ) уонна сүрүн судаарыстыбаннай эксээмэн (ОГЭ) ыытыллаллар, болдьохторо кыратык сыҕарыйан эрэ биэриэхтэрэ. Барыллаан бэс ыйын 8-9 күнүттэн саҕаланыахтаахтар. 9-с кылаастар нуучча тылын уонна математиканы туттараллар. 11-с кылаастарга – барыта бырагыраама быһаатынан.
Ыйытыы: Бүтүн Арассыыйатааҕы бэрэбиэркэлиир үлэ (ВПР) туох диэн буолла?
Хоруй: Бүтүн Арассыыйатааҕы бэрэбиэркэлиир үлэ (ВПР) кэлэр үөрэх дьылын саҕаланыыта, балаҕан ыйыгар көспүтэ.
Ыйытыы: Оскуолалар хаһан үлэлиэхтэрэй?
Хоруй: Сүрүннээн ыраахтан (дистанционно) да буоллар, оскуолалар үлэлии тураллар. Оттон ыраах нэһилиэктэргэ оҕолор оскуолаҕа баран миэстэтигэр үөрэнэллэр. Маннык эрэсииминэн үөрэх дьыла бүтүөр диэри үөрэнэллэрэ буолуо.
Ыйытыы: Оҕо саадтара быйыл үлэлиэхтэрэ дуо?
Хоруй: Чааһынай, муниципальнай оҕо саадтара хааччахтааһын кэмигэр бары үлэлээбэттэр. Мэдиссиинэ, быраабы араҥачыллыыр уорганнар, коронавируһу бохсууга сылдьар дьон оҕолоругар анал бөлөхтөр эрэ үлэлииллэр.
Людмила ПОПОВА, edersaas.ru
Мария ВАСИЛЬЕВА (СИА) хаартыскаҕа түһэриитэ.