Бүгүн, муус устар 24 күнүгэр, Ил Дархан Айсен Николаев социальнай ситимнэртэн быһа эпииргэ таҕыста, сурутааччыларын ыйытыыларыгар хоруйдаата. Эпиири 5 тыһыынча киһи көрдө.
Быһа эпииртэн быһа тардан ыйытыыларга хоруйдары бэчээттиибит.
Ыйытыы: Өймөкөөҥҥө балаһыанньа хайдаҕый?
Хоруй: Өймөкөөҥҥа баахтанан үлэлиир киһи ыалдьыбыт, Узбекистан олохтооҕо эбит. Анаалыстарын бэрэбиэркэлии сылдьаллар, изоляциялаабыттара. Уус Ньараҕа элбэх киһи ыалдьар түбэлтэтигэр, ыарыы уопсай дьиэттэн тарҕаннаҕына, харантыын биллэрэрбит буолуо.
Ыйытыы: Булт көҥүллэниэ дуо?
Хоруй: Бу күннэргэ быһаарыныыны ылыныахпыт. Федеральнай сулууспалары кытта кэпсэтэн баран биллэриэхпит. Харантыын буола турар сирдэригэр булт көҥүллэммэт. Ыарыы суох сирдэригэр көҥүллэниэн сөп буолуо.
Ыйытыы: «Родительскай» күҥҥэ кылаабыһаҕа сылдьыахха сөп дуо?
Хоруй: Быйыл дьиэҕититтэн олорон дьоҥҥутун саныыргыт-ахтаргыт ордук буолуо дии саныыбын. Кылаабыһаҕа хаһан баҕар барыаххытын сөп буолуо. Бу барыта эһиги доруобуйаҕыт туһугар ыытыллар миэрэлэри тутуһаргытыгар сүбэлиибин.
Ыйытыы: Өрөспүүбүлүкэбит күнэ буолуо дуо?
Хоруй: Онлайн быһыылаах буолуо. Миитиннэр, көрсүһүүлэр буолбаттар. Бэлиэ күнү чугас дьоҥҥутун кытта дьиэҕитигэр бэлиэтээриҥ.
Ыйытыы: Алдаҥҥа харантыын хаһан бүтүөй?
Хоруй: Дьон ыалдьан бүттэҕинэ, ыарыһахтар үтүөрдэхтэринэ харантыын бүтүөҕэ.
Ыйытыы: Өрөспүүбүлүкэ тутууларыгар көрүллүбүт 1,5 млрд солкуобайы ханна ыытаҕыт?
Хоруй: Коронавируһу кытта бохсууга ыыттыбыт, дьон доруобуйатын туһугар. Манан харыстанар малы-салы ыларга, балыыһаларга куойка миэстэтин элбэтэргэ барыаҕа.
Ыйытыы: Амма тыатын кэрдии боппуруоһа туох диэн буоллай?
Хоруй: Бу — икки өрүттээх быһыы-майгы. Саха сиригэр тыа элбэх сиринэн тайаан үүнэр. Сүүстэн тахса сыл үүммүт тыа кэрдиллиэхтээх, оннук гымматахха баһаар буолуон сөп. Билигин бэрэбиэркэ үлэтэ бара турар. Онон аукцион үлэтин барытын тохторого быһаарынным. Амма маһын кэрдии буолбат.
Ыйытыы: Аармыйаҕа сааскы хомуур хаһан саҕаланарый?
Хоруй: Быһаарыныылар ылынылла сылдьаллар. Ыам ыйын 6 күнүттэн саҕаланара буолуо дии саныыбын.
Ыйытыы: Баахтабай бөһүөлэктэри бэрэбиэркэлииллэр дуо?
Хоруй: Билиҥҥитэ баахтабай бөһүөлэктэри барытын бэрэбиэркэлии сылдьаллар, сорох бөһүөлэктэргэ кэккэ боппуруостар бааллар.
Ыйытыы: Дьокуускайга электроннай пропуск систиэмэтэ киириэ дуо?
Хоруй: Суох, билиҥҥитэ оннугу киллэрэр наада суох.
Ыйытыы: Ыһыахтар буолуохтара дуо?
Хоруй: Ыһыахтар бэс ыйын 20 кэнниттэн буолаллар, онуоха диэри сыалай икки ый баар. Быһыы-майгы хайдах буоларыттан тутулуктаах.
Ыйытыы: Дьиэҕэ хааччахтанан олорорго усулуобуйата суох аармыйаттан кэлбит уолаттар хайдах буолаллар?
Хоруй: Оннук балаһыанньалаах уолаттары обсерваторга киллэриэхтэрэ.
edersaas.ru