Ил Дархан мэдиссиинэ үлэһиттэрин, санитарнай быраастары уонна волонтердары наҕараадалаата

Саха сирин баһылыга Айсен Николаев 1141 №-дээх ыйааҕынан коронавирус дьаҥын утары үлэҕэ сылдьар быраастары, сиэстэрэлэри, Роспотребнадзор үлэһиттэрин уонна волонтердары наҕараадалаата.

Айсен Сергеевич күннэтэ ыарахан ыарыыны утары охсуһар миэдиктэри, саастаах дьоҥҥо көмө буолар волонтердары дьоруойдар диэн ааттаата.

Ол курдук,  Өрөспүүбүлүкэтээҕи клиническэй балыыһа сэбиэдиссэйэ, инфекционист бырааһа Владилена Иванова уонна Дьокуускай 1-кы №-дээх поликлиникатын терапевт бырааһа Юлия Тимофеева «Саха Өрөспүүбүлүкэтин үтүөлээх бырааһа» бочуоттаах ааты сүктүлэр.

Оттон СӨ Доруобуйатын харыстабылын үтүөлээх үлэһиттэринэн СӨ Федеральнай сулууспатын управлениетын салайааччытын солбуйааччы Изабелла Самойлова, Роспотребнадзор управлениетын эпидемиологическэй надзор отделын начаалынньыга Любовь Будацыренова, Алдан оройуоннааҕы Роспотребнадзор управлениетын территориальнай отделын начаалынньыга Алексей Селютин уонна Өрөспүүбүлүкэтээҕи клиническэй балыыһа инфекционнай отделениетын старшай мэдиссиинискэй сиэстэрэтэ Сардаана Никифорова буоллулар.

Өрөспүүбүлүкэтээҕи офтальмологическай клиническай балыыһа мэдиссиинискэй сиэстэрэтэ Людмила Рожина уонна волонтердары кытта үлэлиир киин дириэктэрэ Алена Кычкина Ил Дархан грамотатынан наҕараадаланна.

Дьокуускай куорат 1-кы №-дээх поликлиникатын мэдиссиинискэй сиэстэрэтэ Айталина Евграфова «Гражданскай килбиэн» бэлиэнэн наҕараадаланна.

Ил Дархан Махталын волонтердар куорпустарын колл-киинин координатора Алексей Данилов, Дьокуускай куорат 3-с №-дээх балыыһатын терапевт бырааһа Ия Нукунанова, Дьокуускай куорат 2-с №-дээх балыыһатын клинико-диагностическай лабораториятын сэбиэдиссэйэ Тома Плотникова уонна  Өрөспүүбүлүкэтээҕи клиническэй балыыһа санитарката Людмила Халабышева туттулар.

Ыйааҕы кытта сиһилии манна билсиҥ: https://www.sakha.gov.ru/news/front/view/id/3157350

edersaas.ru