Ил Дархан Айсен Николаев олохтоох салайыныы күнүнэн эҕэрдэтэ
Өрөспүүбүлүкэ муниципальнай тэриллиилэрин ытыктабыллаах баһылыктара, үлэһиттэрэ уонна дьокутааттара! Муниципальнай сулууспа күндү бэтэрээннэрэ! Саха Өрөспүүбүлүкэтин салалтатын аатыттан уонна тус бэйэм ааппыттан эһигини олохтоох салайыныы күнүнэн эҕэрдэлиибин!
edersaas.ru
Олохтоох салайыыны уоргана – олус наадалаах уонна нэһилиэнньэҕэ саамай чугас былаас салаата буолар. Дьон күннээҕи кыһалҕатын быһаартара туох ханнык иннинэ эһиэхэ кэлэр. Өрөспүүбүлүкэ дьонун олоҕун-дьаһаҕын хаачыстыбата, уопсайынан биһиги хотугу дойдубут эйгэтэ барыта олохтоох дьаһалта үлэһиттэриттэн, куораттар, улуустар, нэһилиэктэр сэбиэттэрин дьокутааттарыттан улахан тутулуктаах.
Өрөспүүбүлүкэни сайыннарыыга туһуламмыт бары судаарыстыбаннай барыгыраамалары, чорботуллар бырайыактары быһаччы олоххо киллэрээччинэн олохтоох салайыныы уорганнара буолаллар. Олохтоох салайыныы тиһигин кытары социальнай эбийиэктэри, олорор дьиэни-уоту тутуу, олохтоох табаары оҥорон таһаарыы, нэһилиэнньэ дьарыктаах буолуута, кыра уонна дьоҕус бизнес өйөбүлэ ыкса ситимнээхтэр.
Саха Өрөспүүбүлүкэтигэр киллэриллибит олохтоох салайыныы мадьыла дойдуга биир саамай демократичнай мадьыал быһыытынан билиниини ылар. 445 муниципальнай тэрээһин баһылыгыттан 431 баһылык быыбарынан, 14 баһылык гражданнар сходтарынан талыллаллар. Олохтоох салайыныы уорганнарыгар күн бүгүн 3 тыһ. кэриҥэ муниципальнай сулууспалаах үлэлиир. 431 бэрэстэбиитэллээх уорган, 5 тыһ. муниципальнай дьокутаат баар. Бу ааспыт кэм устатыгар олохтоох салайыныы тиһигэ олохтоох былаас института буоларын арылхайдык көрдөрдө: муниципальнай тэриллиилэр кыраныыссалара быһаарылынна, нуормаламмыт быраап базата чопчуланна, бүддьүөттэр икки ардыларынааҕы сыһыан ырычааҕа олохтонно, баайы-дуолу бас билии комплекса оҥоһулунна.
Чуолаан ити иһин, өрөспүүбүлүкэ олохтоох салайыныыга тиһигэ коронавирус дьаҥын утары охсуһууну бэлэмнээх көрүстэ. Бу түбүктээх күннэргэ, дойду бүттүүнэ туруммут кэмигэр, олохтоох дьаһалталар үлэһиттэрэ үтүө суобастаахтык үлэлии-хамсыы, дьоҥҥутун-сэргэҕитин өйүү, көмөнү тэрийэ олороҕут. Бу иһин махтал буоллун Эһиэхэ!
Биһиги сүрүн сорукпут – өрөспүүбүлүкэҕэ олох-дьаһах туруктаах буоларын, хаачыстыбата тупсарын ситиһии. Бу соруктары толорууга олохтоох салайыныы уорганнара көхтөөх кыттыыны ылалларыгар эрэнэбин.
Бүгүҥҥү бырааһынньыгынан барыгытыгар чэгиэн доруобуйаны, туруктаах олоҕу, үлэҕэ ситиһиини баҕарабын! Саха сирин олохтоохторун изоляция эрэсиимин тутуһалларыгар, дьиэлэригэр олороллоругар ыҥырабын. Биһиги төһө түргэнник күннээҕи олохпутугар төннөрбүт онтон улахан тутулуктаах.
Саха Өрөспүүүлүкэтин Ил Дархана Айсен Николаев.