Ил Дархан: “Ленскэйгэ, Алдаҥҥа үс киһи анаалыһа барыллаан коронавирус баарын көрдөрдө”
Бүгүн, муус устар 9 күнүгэр, Ил Дархан Айсен Николаев брифинг кэмигэр, коронавирус ыарыытын тарҕаппат туһугар дьиэҕэ олоруу туһунан (самоизоляция) өссө эбии икки ыйаахха илии баттаабытын иһитиннэрдэ.
edersaas.ru
Бу ыйаахха олоҕуран дьиэҕэ олоруу Дьокуускай куораты, Жатайы, Миринэй, Нерюнгри оройуоннарын сэргэ Ленскэй уонна Алдан оройуоннарыгар тутуһуллуохтааҕын эттэ.
“Тоҕо диэтэххэ, Ленскэй биир, Алдан икки олохтооҕуттан ылыллыбыт барыллаан анаалыс бу дьон ыалдьыбыттарын (положительнай түмүгү) көрдөрдө. Бу дьон уһун кэм устата Арассыыйаҕа олороллор эрээри, дойдуларыгар Арменияҕа, Киргизияҕа бара сылдьыбыттар”, — диэн эттэ.
Бу дьон кэлиэхтэриттэн дьиэлэригэр олорбуттар. Муус устар 5 күнүгэр ылыллыбыт анаалыстар, барыллаан положительнай түмүгү көрдөрбүттэр.
“Кинилэр алтыспыт дьонун барыларын ыйыталаһаллар, анаалыс ылаллар. Барыларыттан анаалыс ыларга суутка кэриҥэ кэм ирдэнэр. Ленскэй, Алдан оройуонун олохтоохторун доруобуйатын хааччыйар туһугар маннык дьаһал ылыллар”, — диэн Айсен Сергеевич иһитиннэрдэ.
Людмила ПОПОВА, edersaas.ru