Ахсынньы 17 күнүгэр Айсен Николаев Өлөөн эбэҥки национальнай улууһугар үлэлээтэ. Ил Дархан Харыйалаах уонна Өлөөн нэһилиэктэрин оҥорон таһаарар тэрилтэлэрин үлэлэрин-хамнастарын билистэ.
Ол курдук, күҥҥэ 200 киилэҕэ тиийэ эт астыыр уонна сир аһыттан 50 лиитирэ араас бородууксуйаны оҥорон таһаарар Өлөөннөөҕү “Оленек-торг” диэн сыахха сырытта. Салгыы «Илкит» диэн ааттаах култуура киинин үөрүүлээх арыллыытыгар ыалдьыттаата. Бу кииҥҥэ киинэ көрдөрөр саала, 200 миэстэлээх сыана, ураһа быһыылаах, сиэр-туом ыытарга аналлаах анал саала эмиэ баар. Маны сэргэ кииҥҥэ бибилэтиэкэ уонна ЗАГС тэрилтэтэ үлэлиэхтэрэ. 2006 сылтан тутуллан саҕалаабыт киин үлэҕэ киирэригэр «АЛРОСА» хампаанньа көмөлөспүтүн туһунан Айсен Николаев бэлиэтээн эттэ. 2018 сыллаахха Өлөөн эбэҥки национальнай улууһа уонна “АЛРОСА” хампаанньа сөбүлэҥ түһэрсэннэр бу тутуу түмүктэннэ.
Ил Дархан Харыйалаах сэлиэнньэтигэр “Өлөөн” сопхуос баазатыгар тэриллибит иис-уус мастарыскыайыгар сырытта. Манна тириини бэйэлэрэ таҥастаан, имитэн, араас таҥаһы-сабы тигэллэрин таһынан, оскуола оҕолорун иискэ, таба иитиитигэр үөрэтэллэр. Тымныыны тулуйар анал матырыйаалы оҥорон, тас таҥаһы тигэр былааннаахтар. Тэрилтэ үлэһиттэрэ маннык таҥас технологиятын “Куттала суох Арктика” диэн хааччахтаммыт эппиэтинэстээх тэрилтэни кытта бииргэ оҥоро сылдьалларын, патент ыллылар да, тигэн атыыга таһаарарга бэлэмнэрин туһунан кэпсээтилэр. Салгыы Ил Дархан тутулла турар оскуола-саад дьиэтигэр сырытта. Оскуола-саад 2018 сылтан тутуллан, тутуу бастакы кэрдииһэ түмүктэммит. Билигин оҕолор эргэ оскуола хаарбах туруктаах буолан, түөрт сиринэн үөрэнэ сылдьаллар. Оскуола үлэҕэ киирэрин олохтоох нэһилиэнньэ эрэнэ күүтэр.
Ньургуйаана Иванова, «Саха сирэ» хаһыат, edersaas.ru
Хаартыска СИА саайтыттан.