Ил Дархан: «2021 сыл өссө ситиһиилээх буоларыгар уонна саҥа саҕахтары арыйарыгар бигэ эрэл­лээхпин»

Саха Өрөспүүбүлүкэтин салалтатын  уонна тус бэйэм ааппыттан эһигини кэлэн иһэр Саҥа дьылынан уонна Ороһуоспанан ис сүрэхпиттэн эҕэрдэлиибин!

Сотору кэминэн бука бары долгуйа күүппүт түгэммит тосхойуо – Кириэмил

кураннарын тыаһа 2021 сыл үүммүтүн кэрэһилиэ. Ааһан эрэр 2020 сыл киһи аймах устуоруйатыгар тосту уларыйыылаах буол­ла. Аан дойдуну атыйахтыы аймаабыт кутталлаах дьаҥ биһиги өрөспүүбүлүкэ­битин эмиэ тумнубата, доруобуйа хары­ стабылыгар уустуктары, экэниэмикэҕэ тыҥааһыны уонна да атын кыһалҕалары үөскэттэ.

Улуу Кыайыы 75 сылын көрсө дойду үрдүнэн Умнуллубат Албан аат, өрөспүүбүлүкэҕэ Патриотизм сылынан биллэриллибит ааһан эрэр сыл саҥа кэм уустуктарын халбаҥнаабакка туоруур, дойдуга таптал уонна сомоҕолоһуу тыынын өссө күүскэ иҥэрэр кыаҕы биэрдэ. COVID­19 турбутунан төһө да ыарахаттар үөскээтэллэр, биһиги сыл саҥа­тыгар ылыммыт былааммытын барытын кэриэтэ олоххо киллэрдибит. Күн ахсын нэһилиэнньэ чөл туругун уонна кут­тала суох буолуутун туһугар бэйэлэрин харыстаммакка үлэлии сылдьар медиктэр­гэ уонна волонтердарга ураты махтал­ бын биллэрэбин. Саха сирин хас биирдии олохтооҕо саҥа олохтонуллар бэрээдэги тутуспутун түмүгэр, кириисиһи утары дьаһаллары кэмигэр ылынан уонна феде­ральнай былаас өйөбүлүнэн биһиги корона­вирус икки долгунун туораатыбыт. Дьаҥ бүрүүкээбит уустук кэмигэр биһиги сыыппара технологиятынан оҥоһуллар өҥө тыын суолталааҕын өссө төгүл өйдөөтүбүт. Ол курдук биһиги дьиэҕэ оло­рон аныгы технология көмөтүнэн үлэби­тин толорор буоллубут, дьоһун суолта­лаах боппуруостары быһаардыбыт, дьиэттэн тахсыбакка үгүс тэрээһини ыыт­тыбыт. Олорор дьиэлэри, оскуолалары, оҕо уһуй­ааннарын, успуорт эбийиэктэрин, муоста­лары тутуу, суол өрөмүөнэ, куораттарга уонна сэлиэнньэлэргэ аныгы инфраструктураны оҥоруу, уопсастыба көҕүлээһиннэ­рин өйөөһүн дьаҥтан тутулуга суох көхтөөхтүк ыытылынна. Биһиги олорор эйгэ­ни тупсарыыга, бырамыысыланнаска, успуорка, киинэҕэ, наукаҕа, култуураҕа уоннада атын салааларга таһаарыылаахтык үлэлээтибит. Бу эппитим барыта сомоҕо­лоһуу, түмсүүлээх буолуу, бэйэ­бэйэҕэ көмө, үтүө сыһыан түмүгэр ситиһилиннэ.

Кэлэр сылга былааммыт киэҥ. 2021 сыл өссө ситиһиилээх буоларыгар уонна саҥа саҕахтары арыйарыгар бигэ эрэл­лээхпин. Дойдубут чэчирии сайдарын туһугар күүспүтүн түмүөхпүт, хас биир­дии Саха сирин олохтооҕо күүстээх уонна модун Арассыыйаҕа, ситиһиилээх уонна аныгы хабааннаах өрөспүүбүлүкэҕэ олоро­рунан киэн туттарын туһугар дьулуһуо­хпут. Ис сүрэхпиттэн чэгиэн туругу, ситиһи­ини, дьолу, сырдык санааны, инникигэ эрэли уонна сайдыыны баҕарабын! Бу үтүө быра­аһынньык алыптаах тыына уонна алаһа дьиэ сылааһа олохпутун үтүө түгэннэ­ринэн толордун!

Саҥа дьылынан, саҥа дьолунан, ытык­-мааны Саха сирин олохтоохторо!