Саха Өрөспүүбүлүкэтин Ил Дарханын Арассыыйа Федерациятын Судаарыстыбаннай былааҕын күнүнэн эҕэрдэтэ
![](https://edersaas.ru/wp-content/uploads/2019/08/SHE_0489-Edit-900x500.jpg)
Саха сирин ытыктабыллаах олохтоохторо!
Саха Өрөспүүбүлүкэтин салалтатын аатыттан уонна тус бэйэм эһигини Арассыыйа Федерациятын Судаарыстыбаннай былааҕын күнүнэн ис сүрэхпиттэн итиитик-истиҥник эҕэрдэлиибин!
Үрүҥ, күөх, кыһыл өҥнөрдөөх былаах аан бастаан үс сүүстэн тахса сыл анараа өттүгэр улуу судаарыстыба былааҕын статуһун ылбыта. Сэбиэскэй Сойуус ыһыллыбытын кэннэ үс өҥнөөх былаах Арассыыйа Федерациятын судаарыстыбаннай былааҕын быһыытынан сөргүтүллүбүтэ. Бу бэлиэ түгэни биһиги 1994 сылтан дьиҥ таһымнаах бырааһынньык быһыытынан бэлиэтиибит. Ол ааспыт уонна билиҥҥи кэм быстыспат ситимнээхтэрин кэрэһилиир.
Саха Өрөспүүбүлүкэтэ улуу дойду эрэгийиэнин быһыытынан Арассыыйа Судаарыстыбаннай былааҕын киэн тутта көтөҕөр. Биһиги историябытыгар Нуучча судаарыстыбата Урал хайаларыттан Чуумпу уонна Хотугу Муустаах байҕаллар кытылларыгар тиийэ биир көлүөнэ олоҕун устатыгар сөҕүмэр сайдыыны тэлэн улуу державаҕа кубулуйбута. Онуоха түөрт үйэ анараа өттүгэр Саха сирэ Уһук Илини баһылааһыҥҥа тирэх буолуута быһаарыылаах суолталаммыта.
Бүгүн биһиги өрөспүүбүлүкэбит сөҕүмэр кыаҕын туһанан Арассыыйа модун күүһүн хас да төгүл үксэтэригэр сүҥкэн эппиэтинэһи сүгэбит. Хас биирдиибит гражданскай позициятыттан, үлэҕэ дьулууруттан, олоххо көҕүттэн, эппиэтинэһиттэн өрөспүүбүлүкэбит, дойдубут дьылҕата тутулуктаах. Судаарыстыбаннай былаах күнэ – күүспүтүн түмүүгэ, сомоҕолоһууга төһүү буолар, төрөөбүт дойдубут олоҕор кыттыгастаахпытын санатар өссө биир тоҕоостоох төрүөт!
Бу бырааһынньык күн эһиэхэ эйэни, этэҥҥэ буолууну, Арассыыйа Федерациятын Судаарыстыбаннай былааҕын албан аатын күүһүрдэр ситиһиилээх үлэни-хамнаһы, чаҕылхай кыайыылары баҕарабын!
Саха Өрөспүүбүлүкэтин Ил Дархана Айсен Николаев.