Ыам ыйын 28 күнүгэр Ил Дархан Айсен Николаев өрөспүүбүлүкэ Аҕа баһылыгынан буолбута биир сылын туолар.
edersaas.ru
Онон бу күннэргэ Саха сирин олохтоохторо биир сыл устата туох уларыйыы тахсыбытын, өрөспүүбүлүкэ олоҕор-дьаһаҕар туох сонун сүүрээн киирбитин анаараллар, санааларын үллэстэллэр.
Бүгүҥҥү күҥҥэ өрөспүүбүлүкэҕэ 330 нэһилиэктээҕи, 145 араас хайысхалаах кулууп, 25 бөдөҥ дьахтар уопсастыбаннай тэрилтэлэрэ баар. Ил Дархан Айсен Николаев өрөспүүбүлүкэ Аҕа баһылыга буолуоҕуттан ыла дьахтар уопсастыба сайдыытыгар олус улахан оруоллааҕын анаан бэлиэтиир. Бу туһунан СӨ Дьахталлар уопсастыбаннай тэрилтэлэрин сойууһун бэрэссэдээтэлэ, РФ Дьахталларын сойууһун Бюротун чилиэнэ Анжелика Андреева санаатын бу курдук үллэстэр:
— Дойду уонна өрөспүүбүлүкэ стратегическай суолталаах тосхоллорун олоххо киллэриигэ дьахтар төһүү күүһүнэн буоларыгар Ил Дархан Айсен Николаев улахан суолта биэрэр. Ол курдук, соторутааҕыта дьахталлар уопсастыбаннай тэрилтэлэрин салайааччылара Аҕа баһылыкпытын кытта демография, доруобуйа харыстабылын, үөрэхтээһин, экология уонна култуура хайысхаларыгар национальнай бырайыактары олоххо киллэрии үлэлэрин анаан атах тэпсэн олорон дьүүллэстибит.
Онон Ил Дархаммыт дьахталлар уопсастыбаннай күүстэригэр тирэҕирэр буолан, норуоттан улахан өйөбүллээх.
Хоту улуустартан биир сыл устата Өймөкөөҥҥө Ил Дархан Айсен Николаев иккитэ тиийэ сырытта. Бу суолталаах сырыылар тустарынан Өймөкөөн улууһун бочуоттаах олохтооҕо, дьыалабыай дьахталлар Бүтүн Сойуустааҕы XIV «Ситиһии» куонкурустарын туризм салаатыгар кыайыылааҕа, Өймөкөөн нэһилиэгин олохтооҕо, урбаанньыт Тамара Васильева бу курдук кэпсиир:
— Былырыын атырдьах ыйыгар нэһилиэкпит олохтоохторо Индигир өрүс хаатыттан тахсан, халаантан эмсэҕэлээбиппитигэр Ил Дархан Айсен Николаев тус бэйэтинэн Өймөкөөҥҥө кэлэн балаһыанньаны билсэн барбыта. Ол кэнниттэн тирээн турар боппуруостар кэмигэр быһаарыллан, кыстыкка этэҥҥэ киирбиппит.
Мин бэйэ дьыалатын тэринэн, туризм салаатыгар үктэммитим быйыл 15 үбүлүөйдээх сыла. Бу кэм устата Тымныы полюһун аатын анаан ааттаан аан дойду 75 араас омук сириттэн кэлбит туриһы көрүстүм. Үлэлээбитим тухары өрөспүүбүлүкэ салалтата быйыл эрэ кыһыҥҥы туризм бэстибээлигэр суолта биэрдэ. Ол курдук, Ил Дархан Айсен Николаев Томторго бэйэтинэн кэлэн, өрөспүүбүлүкэҕэ туризм сайдыытыгар туһуламмыт «төгүрүк остуолу» ыыппыта уонна хотугулуу-илиҥҥи эҥэргэ Өймөкөөнү туризм сайдыытын киининэн оҥорууга санаатын тиэрдэн барбыта. Бу биһиэхэ, туризм эйгэтигэр утумнаахтык үлэлэһэр дьоҥҥо, улахан өйөбүлүнэн буолар.
Ил Дархаммытыгар Айсен Николаевка Тымныы полюһугар — Өймөкөөҥҥө улахан болҕомтону уурарыгар махталбыт муҥура суох. Онон өрөспүүбүлүкэбит Аҕа баһылыга Тымныы полюһунан аан дойдуга биллэр хотугу улууска тустаах болҕомтотун өрүү ууран, күүс-көмө, өйөбүл буолуо диэн эрэлбит сүҥкэн.
Ити курдук, хас биирдии улуус олохтооҕуттан, уопсастыбанньыктан ыйыталастахха, Ил Дархан биир сыллаах үлэтин хартыыната көстөн кэлэр.
Елена ПОТОЦКАЯ, «Саха сирэ» хаһыат, edersaas.ru