СӨ Ил Дархана Айсен Николаев Анал этиитигэр быйыл 12 тыһыынча кэриҥэ киһини хаарбах туруктаах дьиэттэн көһөрбүттэрин эттэ. Бу хаһааҥҥытааҕар даҕаны муҥутуур үрдүк көрдөрүү (рекорд) буоларын бэлиэтээтэ.
“Уонунан сылларга аан бастакытын бырагырааманан Арктика улуустарыгар олорор дьиэ тутуллар. Арктика биэс улууһугар элбэх кыбартыыралаах 11 дьиэ тутулунна, сыл бүтүөр диэри Үөһээ Халыма уонна Эдьигээн улуустарыгар өссө икки дьиэ үлэҕэ киириэҕэ. Бу уопсайа 495 кыбартыыра буолар”, — диэн эттэ. Лидердэр кэккэлэригэр Алдан (7 элбэх кыбартыыралаах дьиэ), Мэҥэ Хаҥалас уонна Чурапчы улуустара (алталыы дьиэ) буолаллар.
Кэлэр сылга үлэ эмиэ салҕаныаҕын иһитиннэрдэ, 26 тыһыынча кэриҥэ Саха сирин олохтооҕо саҥа кыбартыыраҕа көһүөҕэ.
“Ол эрээри, Дьокуускайга саҥа тутуллар дьиэҕэ кыбадыраатынай миэтэрэ 106,4 тыһ. солк. тэҥнэһэр, онтон дьиҥнээх сыаната онноооҕор үрдүк. Бу төрүөтэ чэпчэтиилээх Уһук Илиҥҥи ипотека буолбатах. Сыана саҥа кыбартыыра аҕыйаҕыттан үрдүүр. Өскөтүн 2018 сыллаахха 259 тыһ.кв.м. элбэх кыбартыыралаах дьиэ киллэриллибит эбит буоллаҕына, быйылгы сыл түмүгүнэн барыта 117 тыһ. кв.м. киирэрэ былааннар”, — диэн быһаарда. Итиэннэ мантан тахсар суол биир эрэ буоларын – олорор дьиэ тутуутун тэтимирдии, территориялары сайыннарыы кэлимсэ бырайыактары олоххо киллэрии уонна тутуу индустриятын сайыннарыы диэн эттэ.
Людмила ПОПОВА, “Саха сирэ” хаһыат, edersaas.ru
Хаартыска: СИА