Егор Борисов Хаҥалас улууһун Мохсоҕоллооҕор олорор элбэх оҕолоох Гладкихтар дьиэ кэргэттэригэр ыалдьыттаата. Кинилэр улахан баҕайы саҥа дьиэ туттан киирэн, Ил Дарханы малааһыннарыгар ыҥырбыттар.
edersaas.ru
Бу саас элбэх оҕолоохторго, кыамматтарга көмөлөһөр миэрэлэри ылыныан иннинэ, кини араас улуустарга олорор дьиэ кэргэттэргэ ыалдьыттаабыта, санааларын истибитэ. Уон оҕолоох Андрей уонна Галина Гладкихтар кыараҕас, эргэ дьиэҕэ олороллорун бэлиэтии көрөн, олорор усулуобуйаларын тупсаралларыгар көмөлөһүөх буолбута.
Сыл аҥарыттан эрэ ордук кэм ааспытын кэннэ, Гладкихтарга уларыйыы бөҕө таҕыста. Уон биирис оҕолоро төрөөбүтэ. Галина соторутааҕыта Дьоруой Ийэ бэлиэтин, ону тэҥэ 1 мөлүйүөнү тутан, үөрбүтэ-көппүтэ. Аны субу күннэргэ иллээх дьиэ кэргэн аҕыс хостоох, 190 кв.м. иэннээх улахан дьиэҕэ көһөн киирдилэр. Дьиэлэрэ тутуллан бүтээтин, бары саба түһэн, кылгас кэм иһигэр обуойдаан, кырааскалаан, өрөмүөннээн, малааһынныыр дьоро түгэннэрэ тосхойдо. Ил Дарханы, кини кэргэнэ Прасковья Борисованы, миниистирдэри күндү ыалдьыт быһыытынан көрсөн, ханна олордуохтарын-туруоруохтарын билбэтилэр.
Аҕалара Андрей Александрович элбэх оҕолоох ыалларга дьоһун көмө оҥоһулларын бэлиэтээн туран, тутааччыларга, өрөспүүбүлүкэ, улуус, нэһилиэк дьаһалталарыгар махтанарын биллэрдэ. Дьиэни “Якутцемент” ААУо (сал. Алиш Мамедов) бэдэрээтчиттээн туттарбыт. Хаҥалас улууһа уонна Мохсоҕоллоох нэһилиэгин дьаһалталара олохтоох бүддьүөттэриттэн 500 тыһ. солк. тыыран көмөлөспүттэр. Оттон дьиэни тутууга өрөспүүбүлүкэ бүддьүөтүттэн 2,8 мөл.солк. социальнай төлөбүр бэриллибит.
Егор Афанасьевичка хостору кэритэ сылдьан көрдүлэр, ол быыһыгар оҕолору кытта кэпсэттэ. Оҕолор туох талааннаахтарынан скрипкаҕа, синтезаторга, гитараҕа оонньоон иһитиннэрдилэр, бэйэлэрин уруһуйдарын бэлэхтээтилэр. Аҕалара бэйэтэ да олус үчүгэйдик гитараҕа оонньуур, ыллыыр эбит. Онон бу дьиэ кэргэҥҥэ оҕолор дьоҕурдарын арыйарга, сайыннарарга улахан болҕомтолорун уураллар.
Ол кэнниттэн остуол тула олорон чэйдии-чэйдии өр кэпсэттилэр. Егор Афанасьевич бэйэтин оҕо сааһын ахтан-санаан ааста. Сэрии кэннинээҕи ыарахан усулуобуйаҕа кыараҕас, тымныы дьиэҕэ олорон, толору хааччыллыы, судаарыстыбаттан көмө туһунан санаабат да этилэрэ.
Бу олорон уон биир оҕолоох дьиэ кэргэн туох кыһалҕалааҕын, оҕолор хайдах үөрэнэллэрин, туох куруһуоктарга сылдьалларын, о.д.а. ыйыталаста, сүбэ-ама биэрдэ. Оҕолор күлбүт-үөрбүт харахтарын, дьолломмут сирэйдэрин көрөн, “бэйэм малааһыннаан эрэр саҕа сананным” диэн, үөрбүтүн кистээбэтэ.
Галина Гладких элбэх оҕолоох ийэлэри өйүүр миэрэлэри ылыммытын иһин Ил Дархаҥҥа ис сүрэҕиттэн махтанарын биллэрдэ.
“Сэтинньигэ Дьоруой Ийэ бэлиэни, судаарыстыбаннай наҕарааданы тутаммын, үөрүүм муҥура суох. Ханнык да атын региоҥҥа демографическай бэлиитикэҕэ, социальнай эйгэҕэ маннык улахан болҕомто ууруллубат. Ылбыт биир мөлүйүөммүн дьиэбитин салгыы оҥосторбутугар, миэбэл атыылаһарбытыгар ыытыахпыт”, — диэн кини эттэ.
Егор Борисов 14 киһиэхэ анаммыт чэйдиир сервиһи, оҕолорго оонньуурдары, Саҥа дьыллааҕы минньигэс кэмпиэттээх үрүксээктэри бэлэхтээтэ. Ону тэҥэ архитектура, тутуу миниистирэ Вера Кузакова, үлэ, социальнай көмүскэл миниистирэ Александр Михеев, дьиэ кэргэн, ыччат миниистирэ Афанасий Владимиров, «Якутцемент» генеральнай дириэктэрэ Алиш Мамедов, улуус, нэһилиэк дьаһалталара эмиэ бэйэлэрин бэлэхтэрин туттардылар.
Киэҥ-куоҥ, сырдык дьиэ сылаас эйгэтэ оҕо дьоллоох күлүүтүнэн, үөрбүт-көппүт саҥатынан туолла…
Ангелина Васильева, “Саха сирэ” хаһыат, edersaas.ru
Андрей Сорокин түһэриилэрэ.
