Дьокуускай куоракка, ордук киин өттүгэр, оскуолалар олус туолан тураллара, ноҕуруускалаах үлэлииллэрэ баар кыһалҕа. Ону тэҥэ, бу оскуолалар сэбиэскэй кэмҥэ тутуллубут буолан, эргэрдилэр. Дьокуускай 1-кы №-дээх оскуолата эмиэ маннык туруктаах.
Ил Дархан Айсен Николаев кулун тутар 13 күнүгэр бу оскуола уонна К.Гаврилов аатынан потребительскэй кооперация атыы-эргиэн колледжын дьиэлэрин көрдө-иһиттэ.
Былырыыҥҥыттан ыла бу колледж, тэрийээччитэ “Холбос” тэрилтэ быһаарыытынан, үлэлээн бүппүтэ. Дьиэ иэнэ 2719 кв.м., 4 этээстээх. Бу дьиэни өрөмүөннээн баран, 1-кы №-дээх оскуоланы манна көһөрөр былаан баар.
Айсен Николаев дьиэни көрөн-истэн баран, оскуолаҕа тиийэн, төрөппүттэри, учууталлары кытары көрүстэ.
— Кэнники сылларга оскуола дьиэтэ хаарбах туруктааҕын туһунан хонтуруоллуур уорганнартан элбэх аах оҥоһулунна. Үөрэх кэмигэр оҕолор олохторугар, доруобуйаларыгар туох да куттал суоһуо суохтаах. Хомойуох иһин, буолуохтаах быыбарынан сибээстээн, араас сурах тарҕанна. Оскуоланы куорат кытыытыгар көһөрөллөр, оттон эргэ дьиэтин көтүрэн баран, олорор дьиэни туталлар үһү диэн сурах баар. Дьон бу араас сурахтартан долгуйара биллэр, — диэн Ил Дархан эттэ.
Бу кэнниттэн кини атыы-эргиэн колледжын дьиэтин өрөспүүбүлүкэ бас билиитигэр биэрэр туһунан үлэни ыытарга бырабыыталыстыбаҕа, куорат дьаһалтатыгар, “Комдрагметалл”, “Холбос” тэрилтэлэргэ сорудахтаата. Сайын өрөмүөн ыытыллыахтаах.
Оттон оскуола эргэ дьиэтин боппуруоһугар үс быһаарыы баар. Бастакытынан, акылаатын өрөмүөннээн баран, үөрэҕи салгыы ыытыы. Иккиһинэн, эбии сыһыары тутууну тутан, оскуоланы кэҥэтии. Үсүһүнэн, оскуоланы көтүрэн баран, бу миэстэтигэр Сталин саҕанааҕы ампир истиилинэн саҥа дьиэни тутуу.
— Бырабыыталыстыба куорат дьаһалтатын кытары бу боппуруоһу көрөн баран, биир ый иһинэн бу үс быһаарыыттан биирин ылыныахтаах. Ленин проспегар турар дьиэ бары ирдэбиллэргэ эппиэттиир, хараҕы үөрдэр көстүүлээх буолуохтаах, — диэн Айсен Николаев эттэ.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru