Ил Дархаҥҥа Орджоникидзе болуоссатын саҥалыы уларытан оҥоруу бырайыагын көрдөрдүлэр
СӨ Ил Дарханыгар Айсен Николаевка Орджоникидзе болуоссатын саҥалыы уларытан оҥоруу бырайыагын көрдөрдүлэр.
Бүгүн, от ыйын 17 күнүгэр, Ил Дархан Айсен Николаев Дьокуускай куорат килбэйэр киинигэр Орджоникидзе болуоссатын саҥалыы уларытан оҥоруу бырайыагын билистэ.
Болуоссаты саҥа тыынныыр, уларытан оҥорор бырайыак 2014 сыллаахха оҥоһуллубута. Бырайыак билиҥҥи сыаната бырайыактыыр-сметнай докумуоҥҥа көннөрүү төһө киирбититтэн тутулуктанан, 200 мөл.кэриҥэ буолуон сөп.
Бырайыагынан, саҥардыллыбыт болуоссакка фонтан зоната, тыйаатыр сирэ, Былатыан Ойуунускай ааркалаах пааматынньыга хаалаллар. Амфитыйаатыры тутар туһунан этии баар. Бырайыакка маны сэргэ үүнээйилэри олордор, дьон сынньанар, массыыналары туруорар сирдэри кэҥэтиилэр көрүллэллэр.
Саҥалыы уларытан оҥорууну 2025 сылга диэри олоххо киллэрии былааннанар.
Бырайыак биһирэмигэр Ил Дархан Айсен Николаевка Орджоникидзе болуоссатын Былатыан Ойуунускай аатыгар уларытыахха сөбүн туһунан этилиннэ. Маныаха Ил Дархан бу боппуруоска уопсастыбаннаһы кытары дьүүллэһэр наадатын бэлиэтээтэ.
Андрей Сорокин (СИА) хаартыскаларга түһэриитэ
+1
+1
+1
+1
+1
+1
+1