Сүрүн

Ил Дархаҥҥа дьон-сэргэ кыһалҕатын эттэ

СӨ Ил Дархана Айсен Николаев бэҕэһээ, ахсынньы 1 күнүгэр, «Биир ньыгыл Арассыыйа» баартыйа уопсастыбаннай приемнайыгар куйаар ситиминэн дьону-сэргэни кытары кэпсэттэ, ыйытыыларыгар хоруйдаата. 

Дьон-сэргэ кэтэх дьиэлэрин киин ититэр ситимҥэ холботорго, оптоволокно лиинийэтин киллэттэрэргэ, туһамматах авиабилиэттэрин харчытын төнүннэрэргэ көмөлөһөрүгэр көрдөстүлэр.

«Өрөспүүбүлүкэ олохтоохторун долгутар ыйытыыларга суһаллык хардарыы уонна чопчу миэрэни ылыы — бу биһиги быһаччы эбээһинэспит. Былаас аһаҕас буолуохтаах, дьону-сэргэни кытта кэпсэтиэхтээх«, — диир Айсен Николаев.
Куйаар ситиминэн сибээс кэмигэр, биир бастакынан Усуйаана улууһун Хайыр сэлиэнньэтиттэн Алена Готовцева Ил Дархаҥҥа ыйытыы биэрдэ. Кини кэтэх дьиэни киин ититэр ситимҥэ холбооһун боппуруоһун быһаарарыгар көрдөстө.
Айсен Николаев Хайыр сэлиэнньэтигэр инвестиционнай бырагырааманан  «Теплоэнергосервис» АУо үүнэр сылга 25 дьиэни, ол иһигэр, Новай уул. 1 нүөмэригэр олорор Готовцевтар дьиэлэрин эмиэ киин ититэр ситимҥэ холбуохтаахтарын эттэ.
Нина Березкина Уус Маайа оройуонугар Элдьикээҥҥэ оптоволокно ситимин киллэрии болдьоҕун ыйытта. Бөһүөлэккэ төлөпүөҥҥэ спутнигынан эрэ сибээс баар, интэриниэт суох. Сибээс хаачыстыбата мөлтөх. Оттон тарыып олус үрдүк.
Ил Дархан Уус Маайа оройуонун дьаһалтатын уонна «Ростелеком» ПАУо икки ардыларыгар түһэриллибит хантараак иитинэн, билигин Уус Маайаҕа Күпкэ диэри сибээс тиһигин тардарга тирэхтэри тутуу үлэтэ ыытылларын иһитиннэрдэ. Балары ахсынньы 15 күнүгэр диэри туруоруохтаахтар. Ол кэнниттэн салгыы, Элдьикээҥҥэ диэри оптоволокно ситимэ  тардыллыахтаах. ВОЛС тутуута түмүктэммитин кэнниттэн, бөһүөлэккэ сыл бүтүөр диэри 4G мобильнай интэриниэттэниэхтэрэ.
Элбэх оҕолоох ийэ Мария Софронеева 2020 сыллаахха ылбыт авиабилиэтин харчытын төнүннэрэригэр Ил Дархан тирэх буоларыгар көрдөстө. 2020 сыллаахха тохсунньуга кинилэр дьиэ кэргэн «Дьокуускай-Симферополь» хайысханан көтөргө сэттэ билиэти атыыласпыттар. Ол эрээри, коронавирус дьаҥа туран, кыайан барбатахтар. Авиахампаанньа бу дьиэ кэргэн туһаммакка хаалбыт билиэтин ваучерга атастаһарга этии киллэрбит. Оттон дьиэ кэргэн харчытын төнүннэрэн ылыан баҕарарын биллэрэр.
Айсен Николаев боппуруоһу быһаарарга көмөлөһүөх буолан эрэннэрдэ, СӨ Тырааныспарга уонна суол хаһаайыстыбатын министиэристибэтигэр 2021 сыл ахсынньы 20 күнүгэр диэри элбэх оҕолоох дьиэ кэргэҥҥэ туһаммакка хаалбыт авиабилиэттэрин сыанатын толору төннөрөллөрүгэр көмөлөһөргө соруйда.
Андрей Сорокин (СИА) хаартыскаҕа түһэриилэрэ.
0
0