Икки киһини өлөрбүт уонна биирдэһиттэн харчы уорбут Алдан 40 саастаах олохтооҕор суут бириигэбэрэ таҕыста.
Суут быһаарбытынан, 2016 сыл алтынньы 22 күнүгэр Солнечнай микро-оройуоҥҥа үс киһи биир дьиэҕэ арыгылаабыт. Ол аһаан-сиэн баран, дьиэлээх хаһаайын уонна ыалдьыттартан биирдэстэрэ тус-туспа хосторго утуйа барбыттар.
Үһүс киһи ордубут арыгыны иһэн баран, хаһаайын утуйа сытар хоһугар тиийэн, арыгы атыылаһарга харчы көрдөөбүт. Онуоха анараата аккаастаабыт.
Кыыһырбыт ыалдьыт куукунаҕа тиийэн быһах ылбыт уонна төннөн кэлэн, ороҥҥо сытар киһини түөртэ быһаҕынан түөскэ анньыбыт. Быһаҕын соннук киһи этигэр хаалларбыт.
Онтон атын хоско утуйа сытар киһи туоһу буолуо, уорганнарга тыллыа диэн куттанан, куукунаҕа баран, иккис быһаҕы ылбыт уонна кэлэн, бу атаһын искэ уонна түөскэ анньан өлөрбүт. Уонна эмиэ быһаҕын ылбакка, киһи этигэр хаалларбыт.
Бөрөстүүпүнньүк икки киһини харса-хабыра суох өлөрбүтүн таһынан, биирдэһин сиэбиттэн 2 тыһ. солк. харчы баарын уоран барбыт.
Суут уурааҕынан, өлөрүөхсүт уонна уоруйах 18 сыл 3 ыйга кытаанах эрэсиимнээх холуонньаҕа көҥүлэ быһыллыбыт. Манна эбии, босхолонон таҕыстаҕына, 2 сылга көҥүлэ хааччахтанар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.