Икки сыллааҕыта Ньурба улууһугар буолбут дьыала бүтүн өрөспүүбүлүкэни аймаан турардаах. Ол туһунан мин “Сылы быһа муҥнаабыттар” диэн ыстатыйабар суруйбутум (“Саха сирэ”, 47 №, 30.04.15).
Вера МАКАРОВА, «Саха сирэ» хаһыат, https://edersaas.ru/
Онно Ньурбаҕа С. диэн ыаллар иитэ ылбыт оҕолорун – оччолорго 2 эрэ саастаах уолчааны – ыстааныгар ииктиирин иһин сорун сордообуттар этэ. Оҕону балыыһаҕа көрдөрөн эмтэтиэхтэрин оннугар, бэйэтин кыайан көмүскэммэтин, көрүммэтин өйдүү-өйдүү, кырбыы-охсо сылдьыбыттар. Ону ааһан, ийэтэ буолуохсут оҕо кулгаахтарын, ууһатар уорганын хайыта тардар адьынаттаах эбит. Ол курдук сылы быһа муҥнаабыттар. Маныаха бу дьон бэйэлэрин оҕолоругар итинник кырыктаахтык сыһыаннаспаттар эбит.
Оҕону маннык атаҕастааһын чахчытын улуустааҕы эпиэкэ уонна харалта уорганнара булан, борокуратуура бэрэбиэркэ ыыппыта. Ол бэрэбиэркэ матырыйаалларыгар олоҕуран, РФ Холуобунай кодексатын 156-с ыстатыйатынан дьыала тэриллибитэ. Ол эбэтэр, сокуоннай сааһын ситэ илик оҕону иитэр эбээһинэһи толорбот буолуу уонна оҕоҕо кырыктаахтык сыһыаннаһыы бэлиэтэ баарынан. Бу ыстатыйанан көрүллэр сүрүн накаастабыл миэрэ – күһэлэҥ эбэтэр көннөрүнэр үлэҕэ ууруу.
Онно биһиги хаһыаппыт улуус борокуруора Артем Ильинниин сибээстэһэ сылдьыбыта. Биһиги ыйытыыбытыгар кини: “Оҕо доруобуйата билигин этэҥҥэ эрээри, уйулҕатыгар улахан охсууну ылбыт – киһиттэн куттана сылдьар буолбут, кимиэхэ да тыыттарбат, чугаһаатахтарына, тута ытаабытынан барар”, — диэн хоруйа дууһаны аймаабыта. Ити дьыаланы тиһэҕэр диэри хонтуруоллуулларын эппитэ.
Бу айдааннаах дьыала тугунан түмүктэммит эбитий? 2015 сыл бэс ыйын 9 күнүгэр дьыала суукка көрүллэн, бу кэргэнниилэргэ буруйдуур бириигэбэр тахсыбыт. Ити 156-с ыстатыйанан. Суут кинилэри 2 сылга көҥүллэрин быһары усулуобунайынан ааҕан, биир сыл тургутар болдьоххо уурбут. Холуобунай-исполнительнай иниспиэксийэҕэ учуокка туруоран, кинилэр хас хардыылара кыраҕы хонтуруолга сылдьыбыт. Улуус борокуруора иһитиннэрбитинэн, бу гражданнар көннөрүммүттэр.
Вера МАКАРОВА, «Саха сирэ» хаһыат, https://edersaas.ru/
Хаартыска: интернет.