Быйыл Саха сиригэр устудьуоннар этэрээттэригэр икки тыһыынчаттан тахса ыччат үлэлиэ.
Кинилэр тутууга, бырамыысыланнаска, тыа хаһаайыстыбатыгар, оҥорон таһаарар уонна өҥөнү оҥорор эйгэлэргэ, оҕо лааҕырдарыгар үлэлиэхтэрэ, күүс-көмө буолуохтара.
СӨ Ыччат дьыалаларыгар уонна социальнай коммуникацияларга министиэристибэ өйөбүлүнэн улуустарга ыытыллар тупсарыы үлэлэригэр көмө-тирэх буоларга анаан уопсайа 10 этэрээт тэрилиннэ. Нам уонна Кэбээйи улуустарыгар 160 байыас чөлүгэр түһэрии, сааскы халаан содулун туоратыы үлэтигэр ылсаллар. Маны сэргэ, тупсарыы үлэтигэр, бааһыналарга күрүөнү-хаһааны тутууга, социальнай эбийиэктэр өрөмүөннэригэр, хаарбах мас тутуулары ыраастааһыҥҥа үлэлииллэр. Ыччаттар Үөһээ Бүлүүгэ Олоҥхо ыһыаҕар эбийиэктэри бэлэмниир үлэҕэ кыттыбыттара. Бүлүүгэ «Табыс» ыччат бэстибээлигэр, Таатта, Үөһээ Бүлүү, Чурапчы улуустарыгар үбүлүөйдээх тэрээһиннэргэ бэлэмнэниигэ көмөлөһөллөр.
«Биһиги «Монтажник, Якутуголь, ЯТЭК, Электромонтаж, АрктикТелеком, СГК-1, Анаабыр Алмаастара, РНГ уо.д.а. хампаанньалары кытта, уопсайа сүүрбэттэн тахса тэрилтэни кытта үлэнэн хааччыйыыга дуогабардаспыппыт. Маны таһынан, өссө уонтан тахса тэрилтэттэн бигэргэтиини күүтэбит уонна өссө да үлэ биэрээччилэри эбии көрдүүбүт«, — диэн этэр «Арассыыйа устудьуоннарын этэрээттэрэ» ыччат Арассыыйатааҕы уопсастыбаннай тэрилтэтин Саха сиринээҕи салаатын ыстаабын салайар Айсен Соловьев. Хаачыстыбаны үрдэтэр туһуттан, тыһыычанан байыаһы суолга үлэлииргэ, сыбааркалыырга, пассажирдар вагоннарын арыаллааччыга, о.д.а. үөрэттэрбиттэр.
Ленскэй оройуонугар Чайыҥдаҕа «Север» устудьуоннар норуоттар икки ардыларынааҕы тутар этэрээттэрэ былааннанар. Итиннэ 600 байыас кыттара былааннанар.
Өрөспүүбүлүкэ этэрээттэрин 200 байыаһа Уһук Илини уонна Арктиканы сайыннарыыга РФ министиэристибэтин куратордааһынынан Арассыыйатааҕы, уокуруктааҕы, эрэгийиэннэр икки ардыларынааҕы Уһук Илин үлэ бырайыактарыгар кыттарга былааннаналлар. Өрөспүүбүлүкэҕэ оҕолор сайыҥҥы сынньалаҥнарын лааҕырдарын тэрийиигэ 100-тэн тахса баһаатайы бэлэмнээбиттэр. Хас да үөрэх кыһатын баазатыгар анал этэрээттэр тэриллэллэр, ол иһигэр 460 байыас М.К.Аммосов аатынан ХИФУ баазатыгар. Маны таһынан, Саха сиригэр ойуур баһаардарын умуруорууга үлэлэһэргэ 300 байыастаах этэрээт тэриллэр. СӨ Ил Дархана Айсен Николаев былырыын ойуур баһаарын умуруорууга кыттыыга устудьуоннар этэрээттэрин көҕүлээһиннэрин өйөөбүтэ.
СӨ Ил Дархан уонна СӨ Бырабыыталыстыбатын пресс-сулууспата