«Икки сулус»: уһуйааччы уонна устудьуон үтүө ситимнэрэ

Бөлөххө киир:
Никита Платонов хаартыскаҕа түһэриитэ. 

Ырыа ураты эйгэ, туспа турук. Дьон олоҕор эмиэ улахан оруолу оонньуур: санньыйбыт санааны суох оҥорор, сүргэни көтөҕөр, кынаттыыр. «Мин аҕам алааһар, Лэбийэм күөлүгэр Аар хатыҥ күлүгүн көрүнэн эрдэҕэ…» — диэн Саха сирин дьоно бүттүүнэ билэр Анастасия Варламова ырыата «Сэргэлээх уоттара» култуура киинин сыанатыттан истиҥник, сылаастык иһиллэр.

Толорооччулар «Икки сулус» күрэс кыайыылаахтара, М.К.Аммосов аатынан ХИФУ Хотугулуу-Илиҥҥи норуоттар тылларын уонна култуураларын үөрэтэр үнүстүүт саха тылын үөрэтии мэтиэдикэтин хаапыдыратын уһуйааччыта, дассыан, филология билимин хандьыдаата Галина Захарова уонна устудьуона, удьуор утумнаах Уус Алдан улууһуттан тардыылаах, ырыа аргыстаах Айталина Пухова. 

«Муус устар 10 күнүгэр култуура киинигэр үнүстүүппүт иһинэн маннык хабааннаах ырыа күөн-күрэһэ бастакытын ыытылынна. Галина Алексеевналыын ырыабытын биир санаанан бэркэ талан, толорон, кыайыы өрөгөйүн билэммит, эмиэ да соһуйбуппут, эмиэ да үөрүүбүт муҥура суох.  Кыттааччылар, көрөөччүлэр олус сэргэхсийбиттэрэ. Мин ырыа куттаах дьиэ кэргэҥҥэ төрөөммүн, кырабыттан ыллыыбын. Алексей, Екатерина Егоровтар «Сэргэлээх сулустара» устуудьуйаларыгар биир сыл дьарыктаммытым. Ону таһынан, «ИМКО» диэн устудьуоннар идэлээх сойуустарын биир көхтөөх тэрилтэтигэр сылдьаммын, дьонтон толлубакка, сыанаҕа холкутук туттарга үөрэммитим» , — диэн кэпсиир Айта.

Куонкурус тэрийээччилэрэ, үнүстүүт талба талааннаах устудьуоннара — Иван Бушуев уонна Тимур Тихонов. Кинилэр бу күрэһи өссө күһүн хосторугар сахалыы ырыа истэ олорон: «Арай бу ырыаны дириэктэрбит  ыллаатын?» — дии санаабыттар. Дьэ, ол ыра санаалара олоххо киирдэ.

Уһуйааччы сылыгар анаммыт «Икки сулус» күрэскэ үнүстүүт сэттэ хаапыдырата кыттыыны ылбыт.

Үнүстүүт дириэктэрэ Гаврил Торотоев, ырыаһыттар Кылаан Кындыл, Аскалон Семенов, Кирилл Матвеев кыттааччылары сыаналаабыттар, сыл ахсын ыытарга этии киллэрбиттэр. Кыттааччылар бары туоһу суругунан уонна сыаналаах бириистэринэн наҕараадаламмыттар.

+1
0
+1
0
+1
3
+1
0
+1
0
+1
0
+1
0