Бүгүн Дьокуускай куорат 25-с №-дээх оскуолата үөрүүлээх быһыыга-майгыга аһылынна. Саҥа оскуола судаарыстыбаннай-чааһынай бииргэ үлэлэһии бырагырааматынан тутулунна. Күн бүгүн манна 800-тэн тахса оҕо үөрэнэр.
edersaas.ru
Аалай лиэнтэни СӨ Ил Дархана Айсен Николаев, Дьокуускай куорат мэрэ Сардаана Авксентьева, 25-с нүөмэрдээх оскуола дириэктэрэ Иван Захаров, 9-с кылаас үөрэнээччитэ, мас тардыһыыга, хары баттаһыытыгар, хапсаҕайга, тхэквондоҕа араас күрэхтэһиилэр призердара, ВорлдСкиллс (Джуниор) Бүтүн Арассыыйатааҕы турнирын кыттыылааҕа Андрей Экстор быстылар.
Тустаах оскуола 1962 сыллааҕы мас тутуута эргэрэн, 2015 сыллаахха «Сахагипрозем» тэрилтэ дьиэтин атыылаһан, оҕолор үөрэнэллэригэр сөп түбэһэрин курдук уларытан, күн бүгүҥҥэ диэри онно үөрэнэн кэллилэр. Бастакы сыбаайа түһэриллиэҕиттэн баара-суоҕа икки сыл ааста. Аныгы ирдэбилгэ бары өттүнэн эппиэттиир саҥа оскуола дьиэтин тутан дьэндэттилэр.
“Бүгүн Дьокуускай куоракка уопсай үөрэхтээһин биир даҕаны мас оскуолата хаалбата диэн хорсуннук этиэхпитин сөп. Билигин 4-с, 34-с уонна мөлтөхтүк саҥарар оҕолор оскуолалара хааллылар. Бу сылтан судаарыстыбаннай-чааһынай бииргэ үлэлэһии иитинэн, аны ити оскуолалары оҥоруу бырайыага саҕаланыаҕа. Уонна икки-икки аҥаар сылынан оҕолор эмиэ 25-с оскуола курдук саҥа дьиэҕэ үөрэнэр кыахтаныахтара”, — диэн Ил Дархан иһитиннэрдэ.
Дьокуускай куорат мэрэ Сардаана Авксентьева: “Оскуоланы кэрийэн көрдүбүт — сырдык, киэҥ-куоҥ тутуу. Оскуола үчүгэй педагогическай кэлэктииптээх, бары өттүнэн хааччыллыылаах. Оҕолорбут үөрэнэллэригэр, сайдалларыгар усулуобуйа барыта баар. Куоракка икки спортивнай саалалаах бастакы оскуола буолар. Оҕолор спорт араас көрүҥүнэн дьарыктаныахтара. Баҕар, кэнэҕэһин мантан саҥа сулустар үүнүөхтэрэ”, — диэн эттэ.
Оскуола 2018 сылтан ВорлдСкиллс (Джуниор) “кровельнай дьыала” компетенция анал киининэн буолар. 2015 сылтан Кэҥкэмэ хайысхатынан спорт-туризм үөрэх бырагырааматын олоххо киллэрбиттэр.
Людмила ПОПОВА, “Саха сирэ” хаһыат, edersaas.ru
Анатолий ШЕСТАКОВ хаартыскаҕа түһэриитэ.