Сэтинньи 9 түүнүгэр Дьокуускай куорат Маҕанныыр суолугар баар дьиэҕэ кырачаан икки саастаах оҕону кииринньэҥ аҕата кырбаан өлөрбүтүн туһунан ынырык сурах өрөспүүбүлүкэни тилийэ көппүтэ.
Билигин бу киһийдэх уорбалааччы быһыытынан сылдьар. Бу дьулаан быһылаан кэннэ тута Арассыыйа Федерациятын холуобунай кодексатын 105 ыст. 2 чааһын «в» пуунунан (кыра саастаах оҕону өлөрүү) холуобунай дьыала тэриллибитэ.
Түөрт оҕолоох эдэр ийэ уорбаланааччыны кытта бииргэ олорбуттар. Ханна да түптээн үлэлээбэт, иһэр-аһыыр кэргэн эдэр ийэни куруук атаҕастыыр эбит. Түөрт саастаах орто уолун эмиэ урут кырбыы сылдьыбытын туһунан урут ыаллыы олорбут дьоно кэпсээбиттэр. Ыаллара аһынан-таҥаһынан көмөлөһөллөр эбит. Биирдэ түөртээх уол кырбаммытын көрөн, полицияны ыҥырбыттар. Ол эрээри оҕоҕо илиитин көтөхпүт киһиэхэ ханнык да миэрэ ылыллыбатах. Ол түмүгэр, саҥа олох олорон эрэр кырачаан Богдан олохтон туораабыта соһумар.
Саха сиригэр улахан дьон илиититтэн оҕо өлүүтэ бу бастакы түгэн буолбатах. Бэлиэтээн эттэххэ, маныаха маарынныыр түбэлтэ Тиксиигэ буолбута. Икки сыллааҕыта Уус Алдаҥҥа төрөппүт аҕа уончалаах уолун кырбаан улаханнык эчэппитэ. Өссө төһөлөөх элбэх ийэлэр, оҕолор атаҕастабылы тулуйа олороллоро буолуой? Ама, оҕоҕо илиитин көтөҕөр киһи бэйэтэ оҕо буола сылдьыбатаҕа буолуо дуо?
Ульяна ЗАХАРОВА, edersaas.ru