Саха сирин Силиэстийэлиир кэмитиэтэ икки холуобунай дьыаланы тэрийдэ. Сэтинньи 9 күнүнээҕи түүнүгэр Дьокуускай куорат Маҕанныыр трагын уулуссатыгар баар дьиэҕэ икки саастаах оҕо өлүгэ көстүбүтүнэн Арассыыйа федерациятын холуобунай кодексатын 105 ыст. 2 чааһын «в» пуунунан (кыра саастаах оҕону өлөрүү) холуобунай дьыала тэрилиннэ.
«Быһылаан буолбут сирин уонна оҕо өлүгүн көрүү түмүгүнэн оҕо ийэтэ доппуруостанна. Силиэстийэ хаамыытынан оҕо ийэтин кытта бииргэ олорор 25 саастаах, хаста да сууттана сылдьыбыт эр киһи бу дьыалаҕа кыттыгастаах буолуон сөп диэн төрүөт үөскээтэ, кини кыбартыыраттан куоппут», — диэн эрэгийиэннээҕи СУ Силиэстийэлиир кэмитиэтэ иһитиннэрдэ.
Уорбаланааччыны ол күн туппуттар. Маны таһынан силиэстийэлиир уорганнар сэрэтэр үлэни тэрийиэхтээх уоргаҥҥа Арассыыйа федерациятын холуобунай кодексатын 293 ыст. 2 чааһынан холуобунай дьыала тэрийбиттэр. Силиэстийэ сабаҕалыырынан, үлэ эбээһинэһин ситэтэ суох толоруу түмүгэр уустук балаһыанньалаах дьиэ кэргэни эрдэттэн билбэккэ ханнык да сэрэтэр үлэлэр ыытыллыбатахтар. Билиҥҥи туругунан доппуруостар, докумуону үөрэтии уонна холуобунай дьыалалары силиэстийэлээһин бара турар.
Ульяна ЗАХАРОВА.