Олунньу 1 күнүгэр СӨ Ил Дархана Айсен Николаев быһа эпииргэ тахсан тохсунньу ыйдааҕы түмүктэри таһаарда. Ол курдук ааспыт ый биһиги Сахабыт сиригэр экология уонна айылҕа ресурсатын миниистирэ Александр Козлов кэлэн барда. Бу туһунан Айсен Сергеевич маннык сырдатта:
— Бүтүн Арассыыйа недратын, сирин-уотун, айылҕатын быһаарар киһи хамаандатын кытта Дьокуускайга кэлэн барда. Биһиги сөбүлэҥ түһэристибит, ол курдук ойуур баһаардарын утары туох үлэлэр ыытыллыахтаахтарын кэпсэттибит. РФ бүддьүөтүттэн миллиартан тахса көмөнү тыа хаһаайыстыбатыгар ыллыбыт. Бу көмө былырыыҥҥытааҕар биэс аҥаар төгүл элбэх буолар. Онон сөптөөхтүк толкуйдаан туттуохпутун наада. Ойуур баһаарын утары буолбакка, ойуур баһаара тахсыбатын курдук сөптөөхтүк дьаһаныахтаахпыт дии саныыбын. Ол курдук эбии ыстааттаах үлэһиттэри ылан, тиэхинньикэ, авиахампаанньалары кытта дуогабар түһэрсиитэ о.д.а элбэх тэрээһиннээх үлэлэри саҕалыахпытын наада. Ойуур баһаардарын 96-99% үксэ кураанах чаҕылҕантан тахсар.
Маны сэргэ Федерация Сэбиэтин спикера Валентина Матвиенколыын көрсүһүү эмиэ улахан суолталаах. Биһиги саҥа бырайыактарбытын билиһиннэрдибит. Маныаха Өлүөнэ муостатын тутууну эмиэ кэпсэттибит. Саҥа бырайыакка киирэр буоллахха, биһиэхэ, өрөспүүбүлүкэҕэ анал инфекционнай сулууспа уонна балыыһа наадатын эттим. Бу боппуруоһу федеральнай таһымҥа РФ былаанныыры ыйыталастыбыт. Бырайыагын уонна сметатын үллэтэ оҥоһуллан бэлэм госэспэртиисэҕэ сытар. Бу биһиги тымныы килиимэппитигэр сөп түбэһэр тутуу буолуохтаах. Иккис улахан бырайыакпытынан мэдиссиинэ эйгэтигэр каадыры бэлэмнээһин буолар. Ол курдук каадыр тиийбэтин бу уустук балаһыанньаҕа илэ харахпытынан көрдүбүт. Онон ХИФУ иһинэн быраастары, миэдиктэри бэлэмнииргэ саҥа улахан үөрэх кыһата наадата ирдэнэр. Маныаха устудьуоннар олорор уопсай дьиэлэригэр тиийэ толкуйдуохха наада. Билигин тыа сирин этэ да барыллыбат, оннооҕор куоракка быраас, миэдик тиийбэт. Поликлиникалар ыстааттара 60 эрэ% толору диэн бэлиэтиэххэ наада. Онон бэйэбит эрэгийиэммитигэр, ХИФУ-гар мэдиссиинэ үлэһиттэрин үүннэрии туһунан кэпсэттибит. Оччотугар инвестиционнай бырагыраамаҕа киллэртэрдэххэ, мэдиссиинэ институтун тутуута үбүлэниэн сөп. Бу тутуу бырайыагын-симиэтэтин үлэтэ оҥоһуллан госэспэртиисэҕэ барбыта.
Ульяна ЗАХАРОВА.