Кулун тутар 24 күнүгэр Ил Дархан Егор Борисов каадырга сыһыаннаах хас да ыйаахха илии баттаата.
edersaas.ru
Бастакы ыйаах быһыытынан, Петр Алексеев “Бырабыыталыстыба Бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ” дуоһунастан босхолонно итиэннэ Бырабыыталыстыба Бэрэссэдээтэлин бастакы солбуйааччы эбээһинэһин толорооччунан ананна. Оттон тыа хаһаайыстыбатын уонна ас-үөл бэлиитикэтин миниистирин эбээһинэһин толорооччунан бу иннинэ Нам улууһун дьаһалтатын баһылыгынан үлэлии олорбут, идэтинэн учуонай-агроном Александр Атласов ананна.
Эмиэ маннык ыйааҕынан Михаил Осипов “Бырабыыталыстыба Бэрэссэдээтэлин бастакы солбуйааччы – экономиҥа миниистирэ” дуоһунастан босхолонон, Бырабыыталыстыба Бэрэссэдээтэлин бастакы солбуйааччы эбээһинэһин толорооччунан ананна. Экономика миниистирин эбээһинэһин толорооччунан “Дьокуускайдааҕы килиэп кэмбинээтэ” ААУо генеральнай дириэктэрэ, экономист уонна юрист идэлээх, ааспыт өттүгэр тыа хаһаайыстыбатын уонна ас-үөл бэлиитикэтин солбуйааччы миниистиринэн үлэлээбит Денис Белозеров ананна.
Егор Афанасьевич экономика миниистирин э.т. саҥа анаммыт Денис Белозеровы кытары көрсүһэригэр бу министиэристибэ сүрүн соругунан 2017 с. ылыллыбыт Саха өрөспүүбүлүкэтин 2030 сылга диэри сайдыытын Стратегиятын олоххо киллэрии буоларын бэлиэтээтэ итиэннэ олохтоох оҥорон таһаарыыга, дьоҕус бизнескэ болҕомтону уурарга сүбэлээтэ.
— Ааспыт 10-15 сыл устата биһиги бөдөҥ промышленность салааларын өйөөн кэллибит, аны олохтоох ырыынакка анаан үлэни-хамнаһы тэрийэр, үлэ миэстэтин хааччыйар бэйэбит дьоммутун өйүүр кэммит кэллэ, — диэн тоһоҕолоон бэлиэтээтэ.
Ил Дархан Нам улууһун Никольскай сэл. Сылгыһыт күнүн түмүктүүр дьоро киэһэҕэ тыа хаһаайыстыбатын уонна ас-үөл бэлиитикэтин миниистирин э.т. анаммыт Александр Атласовы сылгыһыттарга билиһиннэрдэ итиэннэ сүөһү-сылгы ахсаанын элбэтэр, чуолаан сылгыны икки төгүл элбээтиннэрэн, сылгыһыт ылар дохуотун икки бүк улаатыннарар хайысхаҕа үлэлиир соругу туруорда.:
— Өр сылларга үлэлээбит уопуппар тирэҕирэн, салааны сайыннарыыга бары күүспүн-уохпун ууран, үтүө суобастаахтык үлэлиэҕим. Сылгы ахсаанын элбэтиигэ быраҕыллан сытар ыраас учаастактары туһаныахпыт, — диэтэ онуоха Александр Атласов.
Раиса СИБИРЯКОВА, “Саха сирэ”, edersaas.ru