Сүрүн Үөрэх уонна наука

Икки оҕо информатиканы 100 баалга туттарда

СӨ Үөрэҕин уонна билимин министиэристибэтэ иһитиннэрбитинэн, быйыл информатика уонна ИКТ биридимиэтигэр биир кэлим эксээмэни 100 баалга икки оҕо туттарбыт. Кинилэр кимнээхтэрий?

edersaas.ru

Ол курдук, өрөспүүбүлүкэтээҕи лиссиэй-интэринээт үөрэнээччитэ Василий Парников (учуутала Мария Уваровская) уонна В.П.Ларионов аатынан физика-тиэхиньиическэй лиссиэй үөрэнээччитэ Данил Парфенов (учуутала Никифор Куличкин) информатикаҕа муҥутуур үрдүк баалы ылан, 100 бааллаахтар кэккэлэрин хаҥаттылар. Инньэ гынан, быйыл өрөспүүбүлүкэ үрдүнэн биир кэлим эксээмэни, уопсайа, 23 оҕо 100 баалга туттарда.

Санатан эттэххэ, былырыын информатика уонна ИКТ биридимиэтигэр В.П.Ларионов аатынан физика-тиэхиньиическэй лиссиэйтэн биир, өрөспүүбүлүкэтээҕи лиссиэй-интэринээттэн үс оҕо 100-түү баалы ылбыттара.

Бэрт сотору кэминэн эрэсиэрбэ күннэригэр туттарбыттар түмүктэрэ биллиэҕэ. Бүгүҥҥү күн туругунан, 21 оҕо Ил Дархан ыйааҕынан биирдэ бэриллэр 100 тыһ. солк. суумалаах бириэмийэни ылыаҕа. Назар Павлов (Н.А. Алексеева аатынан лиссиэй) уонна Виталий Красиков (Уус Маайа улууһун Элдьикээн оскуолата) икки биридимиэккэ сүүстүү баалы хомуйбуттара. Кинилэр 200-түү тыһ. солк. бириэмийэлэниэхтэрэ.

 

“Саха сирэ” хаһыат, edersaas.ru

Хаартыска: СӨ Үөрэҕин уонна билимин министиэристибэтин саайтыттан.

 

 

 

 

 

 

 

1
0
Telegram @edersaas20