«S7» авиахампаанньа сөмөлүөтэ Москваттан Дьокуускайга көппүтэ үс чаас буолбутун кэннэ биир пассажир эмискэ ыалдьан, ыксаллаах түгэн үөскээтэ.
Ити рейскэ медсиэстэрэ Любовь Данилова уонна анестезиолог Александр Алексеев баар буолан, сөптөөх медицинскэй көмөнү оҥорон, пассажир этэҥҥэ буолбут. Дьокуускай авиапордугар сөмөлүөт түһээтин кытта суһал көмөнү ыҥыран, реанимацияҕа илдьибиттэр.
Александр Алексеев Бүлүү улууһун Үгүлээтиттэн төрүттээх. Үгүлээккэ олорор аймахтара, биир дойдулаахтара кини үтүөтүн истэн, “ Үгүлээттэр” батсаап бөлөҕөр, олус үөрбүттэрин биллэрдилэр. “Саша, маладьыас! Оҥорбут үтүөҥ сүүс төгүл үчүгэйинэн төннүөҕэ. Биһиги эйигинэн киэн туттабыт!”, — диэн алгыс тылларын эттилэр. Оттон Александр Александрович: “Ханнык баҕарар медик үлэтин эбээһинэһин быһыытынан көмөлөһүө этэ. Биһиги дьону өрүһүйэр эбээһинэспит, ону, төһө кыалларынан, толордубут”, — диир. Александр ТАРАСОВ, «Саха сирэ» хаһыат, edersaas.ru