Бу ыйга икки коррекционнай оскуола «Үөрэхтээһин» национальнай бырайыагынан, аныгы ирдэбилгэ эппиэттиир мастарыскыайданыа.
Тулаайах уонна төрөппүт көрүүтэ-истиитэ суох хаалбыт оҕолор өрөспүүбүлүкэтээҕи анал (коррекционнай) оскуола-интэринээттэрин уонна анал (коррекционнай) оскуола-интэринээттэрин материальнай-тэхиньиичэскэй баазалара «Үөрэхтээһин» национальнай бырайыагынан тупсарыллар.
Санатан эттэххэ, «Үөрэхтээһин» национальнай бырайыагынан, 2024 сылга диэри 14 коррекционнай оскуолаҕа аныгылыы үлэ мастарыскыайдара тэриллэллэр. Бу «Аныгы оскуола» диэн федеральнай бырайыак чэрчитинэн киирэр. Быйыл саҥардан биэрэргэ 15 мөл. тахса солкуобай үп көрүллүбүт.
СӨ Үөрэх уонна наука миниистирэ Михаил Сивцев адаптированнай бырагырааманан үөрэнэр оскуолалар материальнай-тэхиньиичэскэй баазаларын саҥардан, тупсаран биэрии сүрүн сыалынан буоларын бэлиэтиир. Манна тыырыллыбыт үбүнэн үлэ уруогун мастарыскыайдарын саҥардаллар, психолог, дефектолог, логопед кылаастарын аныгы үйэ ирдэбилигэр эппиэттиир гына оҥороллор. Ону сэргэ, компьютернай кабинеттар, успуорт саалалара тупсарыллаллар. Бу туһунан СӨ Үөрэх уонна наука министиэристибэтин пресс-сулууспата иһитиннэрдэ.
+1
+1
+1
+1
+1
+1
+1