Бу быһылаан былырыын күһүөрү сайын Мэҥэ Хаҥалас улууһун Лоомтука сэлиэнньэтигэр тахсыбыта. Ол кэмҥэ өрөспүүбүлүкэни бүтүннүү аймыы сылдьыбыта. Ол туһунан «Саха сирэ» хаһыат 2016 сыл атырдьах ыйын 18 күнүнээҕи нүөмэригэр суруйбуппут. Дьыала суукка көрүллэн бүтэн, бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, 2016 сыл атырдьах ыйын 14 күнэ үүнэр түүнүгэр Мэҥэ Хаҥалас улууһун Лоомтука сэлиэнньэтиттэн 30 км ыраах баар Хомпу диэн оттуур сиргэ 24 уонна 32 саастаах бииргэ төрөөбүт уолаттар арыгылаабыт дьонноруттан биирдэстэрин кытта кыыһырсыбыттар. Уонна итирбит уохтарыгар, түөрт киһини төрдүөннэрин өлөртүүргэ быһаарыммыттар.
Ол ыар санааларын ситиһэн, иккиэн сааларын ылан, төрдүөннэрин ытыалаан, икки киһини тута миэстэтигэр өлөрбүттэр. Үһүс киһи төһө да бааһырдар, хараҥаҕа саһан, быһылаан сириттэн куотан, полицияҕа тыллаабыт. Төрдүс киһини суһал-силиэстийэлиир бөлөх быһылаан сириттэн булан, улуустааҕы киин балыыһаҕа ыытан, тыыннаах ордубут.
СӨ Үрдүкү суута ини-бии өлөрүөхсүттэртэн биирдэстэрин 18 сылга, иккиһин 10 сылга кытаанах эрэсиимнээх холуонньаҕа көҥүллэрин быһарга уурда. Бириигэбэр сокуоннай күүһүгэр киирэ илик.
Биһиги корр., «Саха сирэ» хаһыат, edersaas.ru
Хаартыска: интэриниэттэн.