Тохсунньу 27 күнүгэр «IKEA» хампаанньаны төрүттээбит Ингвард Кампрад 91 сааһыгар күн сириттэн туораата. Хампаанньа пресс-сулууспата Reuters агенствоҕа биллэрбитинэн, Кампрад Швеция Смоланд провинциятыгар баар дьиэтигэр тыына быстыбыт.
Ингвард Кампрад кулун тутар 30 күнүгэр 1926 сыллаахха соҕуруу Швецияҕа төрөөбүт. Аан дойдуга аатырбыт бизнесмен этэ, кини олус үлэһитинэн биллэрэ. Оҕо эрдэҕиттэн кыра маллары ыалларыгар атылыыра. Оннооҕор боростуой харандааһы, испиискэни уонна харыйа оонньуурун атыылыыр үһү.
Онтон 1943 сыллаахха «IKEA» хампаанньаны төрүттээбит. Бастаан дьиэҕэ туттуллар маллары атылыыра. 1956 сыллаахтан түргэнник хомуллар миэбэли атылыыр буолбута. Кэм-кэрдии баран истэҕин аайы, «IKEA» сайдартан-сайдан испитэ. Бастаан Швеция ырыынагын баһылаан баран, кэлин аан дойдунан барытынан тарҕамыта.
Кампрад өлүөн иннинэ хампаанньаны салайыыны көмөлөһөөччүлэригэр итэҕэйбитэ, эрээри бэйэтэ хонтуруоллуура. Билиҥҥи туругунан, «IKEA» сылга 50 млрд солк. үбү эргитэр.
Николай Попов, «Саха сирэ» хаһыат, edersaas.ru